בס"ד

צה"ל: כאמאס טעראריסטן נוצן ווידער דעם 'קאמאל אדוואן' שפיטאל אין צפון עזה פאר טעראר אטאקעס

די מדינת ישראל מיליטער איז ארויסגעקומען מיט אן ערנסטע באשולדיגונג איבער דעם קאמאל אדוואן שפיטאל אין צפון עזה, זאגנדיג אז כאמאס טעראריסטן נוצן דעם שפיטאל אלס א באזע ארויסצוגיין אויף אטאקעס קעגן די זעלנער.

לויט די מיליטער, האבן זעלנער באמערקט דינסטאג איבערנאכט ווי צוויי כאמאס אפעראטיוון קומען ארויס פונעם שפיטאל. איינער פון זיי האט אנגעבליך אונטערגעלייגט אויפרייס מאטעריאל - וואס ער האט ארויסגעטראגן פונעם מעדיצינישן צענטער - נעבן די מיליטערישע פאזיציעס ביי די אזוי-גערופענע "געלע ליניע".

די צה"ל זאגט אז זייער ציל איז געווען צו שעדיגן די קרעפטן, און ביידע טעראריסטן זענען באטראפן און אומגעברענגט געווארן אויפ'ן ארט צו באזייטיגן די געפאר. די מיליטער האט אידענטיפיצירט איינע פון די טויטע אלס מוכאמאד טאמוס, א סנייפער אין די כאמאס מיליטערישע פליגל, וועלכער האט אויך געארבעט אלס אן אנגעשטעלטער אין די ציווילע פארטיידיגונג אגענטור אין עזה.

די מיליטער לייגט צו אז דאס איז נישט קיין איינמאליגע פאסירונג. לויט זיי, האבן טעראריסטן אין די לעצטע טעג ארויסגעפירט אטאקעס פון אינעווייניג אינעם שפיטאל, אינדערצייט וואס זיי ארבעטן איבערצובויען די מיליטערישע מעגליכקייטן פון כאמאס, וואס דאס איז א סיסטעמאטישע פארלעצונג פונעם פייער-אפשטעל. צה"ל באשולדיגט די טעראר גרופע אין ציניש אויסנוצן שפיטעלער און מעדיצינישע אינפראסטרוקטור, וואס שטעלט ציווילע בירגער אין א סכנה דורכ'ן פארוואנדלען היילונגס-ערטער אין א טעראר זאנע, אין קעגנזאץ צו אינטערנאציאנאלע געזעצן.

דאס איז נישט דאס ערשטע מאל וואס דער קאמאל אדוואן שפיטאל איז אין די נייעס. די מיליטער האט שוין דורכגעפירט אן אבלאווע אויפ'ן זעלבן שפיטאל אין דעצעמבער 2024, זאגנדיג דעמאלטס אז כאמאס פירט דארט א קאמאנד צענטער, און האבן געמאלדן איבער דעם ארעסט פון מער ווי 240 פארדעכטיגטע טעראריסטן.

דערווייל זענען די פרישע קלעימס בלויז באשטעטיגט געווארן דורך די מדינת ישראל מיליטער און זענען נאכנישט אומאפהענגיג איבערגעצייגט געווארן. וויבאלד שפיטעלער האבן א ספעציעלע שוץ אונטער אינטערנאציאנאלע געזעצן, ערווארט מען אז עס וועלן נאכפאלגן פראגעס איבער די באווייזן, דעם יעצטיגן צושטאנד פונעם שפיטאל, און די ווערסיע פון די וואס געפינען זיך אינעווייניג.