שוידערליכע טראגעדיע אין לאס אנדזשעלעס: א נייעס העליקאפטער האט געקראכט אינמיטן דעקן אן עקסידענט, איבערלאזנדיג 3 טויטע

א שווערע און טראגישע נאכט איז אריבער אויף לאס אנדזשעלעס, ווען אן NBC4 נייעס העליקאפטער וואס האט געהאלטן אינמיטן דעקן א טויטליכע באס עקסידענט, האט פלוצלינג געקראכט און אויפגעריסן אין פלאמען אין די טשעטסווארט געגנט, אומברענגענדיג דריי מענטשן.

די צוויי פאסאזשירן אינעם העליקאפטער, די רעפארטער עליאנא מארענא און דער פילאט דזשארדזש מארסיניוו, ביידע אנגעשטעלטע ביי 'עינדזשל סיטי עיר', זענען אומגעקומען אויפ'ן ארט. ווי אויך איז א פערזאן וואס איז געשטאנען דארט אונטן אויף דער ערד באשטעטיגט געווארן טויט.

דער קראך האט פאסירט דינסטאג ארום 7:00 ביינאכט אין א פארקינג לאט נעבן א סטארעדזש צענטער. דאס האט פאסירט פונקט ווען דער העליקאפטער האט געגעבן א 'לייוו' באריכט פון א פריערדיגע עקסידענט צווישן א סיטי באס און אן SUV קאר וואס האט פאסירט נישט ווייט פון דארט.

נאך איין פערזאן איז אריינגעפירט געווארן אין שפיטאל נאכ'ן קראך. באאמטע געבן איבער אז עטליכע געפארקטע קארס און סטארעדזש קאנטעינערס האבן אויך געכאפט פייער ווען דער העליקאפטער האט אויפגעריסן.

דער פריערדיגער באס עקסידענט אין די סאן פערנאנדא וואלי האט איבערגעלאזט צוויי טויטע און זעקס פארוואונדעטע. דאס האט צוגעצויגן עטליכע נייעס העליקאפטערס צום סצענע איידער די צווייטע טראגעדיע האט פאסירט.

די לאס אנדזשעלעס מעיאר, קארען בעס, האט עס אנגערופן א הארץ-רייסנדע נאכט פאר די שטאט, קלאגנדיג אויף די פארלוסט פון פינף מענטשן אין בלויז עטליכע שעה צייט צווישן ביידע אינצידענטן.

די פעדעראלע אוויאציע אדמיניסטראציע (FAA) און די NTSB האבן געעפנט אן אויספארשונג אויף ביידע אינצידענטן. די NTSB האט באשטעטיגט אז דער העליקאפטער איז געווען א 'יוראקאפטער AS 350 B2' און אינוועסטיגעיטארס זענען ערווארטעט אנצוקומען אויפ'ן סצענע מיטוואך אינדערפרי.

די לאקאלע נייעס סטאנציעס NBC4 און טעלעמונדא 52 האבן אויסגעדריקט זייער טיפסטן טרויער אויף די פארלוסט פון זייערע קאלעגן וואס זענען אומגעקומען בעת'ן אויספירן זייער פליכט, און האבן איבערגעגעבן טרייסט-וואונטשן פאר די פאמיליעס פון אלע אומגעקומענע אין די זעלטענע טראגעדיע.