דעמאקראטישער סענאטאר קריס מוירפי באשולדיגט די פענטאגאן אין אים בלאקירן פון באזוכן די גרעסטע אמעריקאנער באזע אין מיטל מזרח

דער דעמאקראטישער סענאטאר קריס מוירפי זאגט אז די פענטאגאן האט אים נישט ערלויבט אריינצוגיין אינעם 'על אודעיד' לופט באזע, וואס איז די גרעסטע אמעריקאנער מיליטערישע באזע אינעם מיטל מזרח, בעת א קאנגרעסיאנאלע רייזע צום ראיאן. ווי אויך האט די פענטאגאן זיך אנטזאגט פון אראנזשירן פאר אים א 'בריפינג' איבער די אנגייענדע מלחמה מיט איראן.

רעדנדיג צו רעפארטערס אין ריאד, סאודי אראביע, האט מוירפי אראפגעריסן דעם שריט אלס "אומגעהערט און קעגן די קאנסטיטוציע". ער האט באשולדיגט די טראמפ אדמיניסטראציע אז זיי ארבעטן אקטיוו צו באהאלטן די קאסטן, די צאל קרבנות און די עפעקטן פון די מלחמה, סיי פונעם קאנגרעס און סיי פונעם אמעריקאנער פאלק.

מוירפי, וועלכער איז א מיטגליד אין די סענאט אויסערן באציאונגען קאמיטע, האט געזאגט אז ער האט געמאכט די נסיעה ספעציעל כדי צו זען מיט די אייגענע אויגן די שאדנס וואס די מלחמה האט אנגעמאכט פאר אמעריקאנער איינריכטונגען אינעם ראיאן, און וויאזוי עס האט אנגעצויגן די באציאונגען מיט די לאקאלע אליאירטע. ער האט אנגעוויזן אז ער איז דער ערשטער דעמאקראטישער געזעצגעבער צו באזוכן דעם גאלף ראיאן זינט די קאנפליקט האט אויסגעבראכן.

די פענטאגאן האט אבער אפגעווארפן מוירפי'ס טענות. א הויכראנגיקער פארטיידיגונגס באאמטער האט געזאגט פאר רעפארטערס אז דעם סענאטאר'ס אפיס איז שוין געווארן אינפארמירט בעפאר די נסיעה אז ער וועט נישט באקומען קיין שטיצע פונעם פארטיידיגונגס דעפארטמענט אריינצוגיין אינעם באזע. דער באאמטער האט אנגעוויזן אויף א פרישע דירעקטיוו פון מערץ דורך דעם פארטיידיגונגס סעקרעטאר פיט העגסעט, וואס באגרעניצט רייזעס צום ראיאן. ער האט קלארגעשטעלט אז די פאליסי איז גילטיג פאר יעדן איינעם צוגלייך, אומאפהענגיג פון וועלכע פארטיי זיי זענען, און אפגעווארפן דעם געדאנק אז מען האט זיך ספעציעל פארלייגט אויף מוירפי.

טראץ וואס מען האט אים צוריקגעוויזן פונעם באזע, האט מוירפי זיך נאך אלס געטראפן מיט'ן קאטאר'ן עמיר, שעיך טאמים בין כאמאד על טאני, און מיט'ן סאודישן קראון פרינץ מוחאמעד בין סאלמאן דורכאויס זיין רייזע. די סטעיט דעפארטמענט, אונטער סעקרעטאר מארקא רוביא, האט געהאלפן אראנזשירן די דיפלאמאטישע מיטינגען. מוירפי האט ארויסגעברענגט דעם קאנטראסט צווישן די סטעיט דעפארטמענט און די פענטאגאן, באשולדיגנדיג די פענטאגאן אין דירעקט שטערן דעם קאנגרעס פון האלטן אן אויג אויף די מלחמה.