פיר לענדער, איין פלאן: 'באדער מעמאראנדום' פארשטערקערט געמיינזאמע מיליטערישע פראדוקציע און טרענירונגען אין דאכא
גאלערי
ווידעאס
בס"ד
טערקיי, קאטאר, פאקיסטאן און אינדאנעזיע שרייבן אונטער א געמיינזאמע מיליטערישע קאאפעראציע אפמאך
טערקיי, קאטאר, פאקיסטאן און אינדאנעזיע האבן אונטערגעשריבן דעם אזוי-גערופענעם "באדער" אפמאך אין דאכא, קאטאר. דער אפמאך איז א פרישע שריט פון די פיר לענדער צו פארשטארקן זייערע מיליטערישע מעגליכקייטן און ארבעטן אינאיינעם אויף פארשידענע פראנטן.
לויט די אפיציעלע מעלדונג, נעמט דער דיעל אריין קאאפעראציע אין די פעלדער פון פארטיידיגונג, פראדוצירן מיליטערישע געווער, טרענירונגען, און ריסוירטש און דעוועלאפמענט. די פיר לענדער האבן ארויסגעברענגט אז דער ציל איז צו פאראייניגן זייערע כוחות און צוזאמען קענען בעסער נאכקומען זייערע געמיינזאמע זיכערהייט געברויכן. עס איז וויכטיג צו באטאנען אז דאס איז בלויז אן אפמאך פון קאאפעראציע און צייגט אויף א געמיינזאמע ציל, אבער די מעלדונג לייגט נישט אראפ דעם אפמאך אלס אן אפיציעלע בונד וואס פארפליכטעט זיי זיך צו פארטיידיגן איינער דעם צווייטן אין פאל פון א קריג.
דער נייער אפמאך איז א דירעקטע פארזעצונג פון עטליכע מיליטערישע פראדזשעקטן וואס די לענדער פירן שוין אן אינאיינעם. טערקיי, צום ביישפיל, טוט שוין יעצט צושטעלן קריגס-שיפן פאר פאקיסטאן, זיי בויען אינאיינעם א נייעם טאנק מיט אינדאנעזיע, און זיי דעליווערן דראונס און געפאנצערטע טראקן פאר קאטאר.
טערקיי פארמאגט די צווייט-גרעסטע ארמיי אין די נאטא (NATO) אליאנץ, און דער נייער אפמאך צייגט וויאזוי זיי פרובירן צו פארברייטערן זייער איינפלוס און אריינדרינגען טיפער אין די מיליטערישע אינדוסטריעס פון עטליכע לענדער אויף איין מאל. דערווייל איז נאך נישט געמאלדן געווארן צי דער נייער אפמאך וועט פירן צו פרישע געמיינזאמע פראגראמען אין די נאנטע צוקונפט, און ווי שנעל דאס וועט פאקטיש אריינגיין אין קראפט.