טראמפ: די עף-בי-איי דאטעבאזע העק קען אויפדעקן דעם אמת איבער די רוסלאנד אויספארשונג און וואלן שווינדל
גאלערי
ווידעאס
פרעזידענט דאנאלד טראמפ האט רעאגירט צו די באריכטן איבער א העקעריי אינצידענט אויף די עף-בי-איי'ס 'נעשאנאל קרייס אינפארמעישאן סענטער' (NCIC) דאטאבעיס. אין אן אינטערוויו אויף פאקס ניוז האט טראמפ אנגעוויזן אז כאטש דער אינצידענט איז א זארג, קען עס מעגליך האבן א פאזיטיווע זייט, זאגנדיג אז עס קען ארויסברענגען באהאלטענע אינפארמאציע איבער קאנטראווערסיאלע אויספארשונגען און מעגליכע וואל פעלשונגען. "אפשר וועלן מיר געוואויר ווערן זאכן וואס מיר וואלטן קיינמאל נישט געוואוסט אנדערש," האט דער פרעזידענט געזאגט.
טראמפ האט ספעציפיש דערמאנט די אזוי-גערופענע רוסלאנד אויספארשונג, וואס ער האט שוין עטליכע מאל אראפגעריסן אלס א פאליטיש-מאטיווירטע שווינדל, און האט אויפגעברענגט די מעגליכקייט אז די העקעריי קען אנטדעקן אינפארמאציע איבער וואל פראד. "וואלט עס נישט געווען גוואלדיג געוואויר צו ווערן איבער רוסלאנד, רוסלאנד, רוסלאנד?" האט טראמפ געפרעגט, טענה'נדיג אז דאס פאלק פארדינט צו הערן מער איבער די סקאנדאלן וואס לויט אים האבן אריינגעלייגט דאס לאנד אין א סכנה.
די באריכטעטע סייבער-אטאקע איז געווען געצילט אויף די NCIC, וואס איז א נאציאנאלע לאו ענפארסמענט דאטאבעיס וואס אנטהאלט אינפארמאציע איבער געזוכטע פארברעכער, פארשוואונדענע פערזאנען, קרימינאלע רעקארדס, געגנבעטע פראפערטי און ארעסט וואראנטן. די עף-בי-איי פארשט אויס דעם אינצידענט, אבער דערווייל איז נאך אומקלאר די פולע פארנעם פונעם העקעריי, ווער די העקערס זענען, און צו וועלכע אינפארמאציע זיי האבן באקומען צוטריט.
דער אינצידענט האט אויפגעברענגט ערנסטע סייבער-זיכערהייט זארגן, וויבאלד די NCIC סיסטעם ווערט טעגליך גענוצט דורך פעדעראלע, סטעיט און לאקאלע פאליציי אגענטורן דורכצופירן בעקגראונד טשעקס, אידענטיפיצירן פארדעכטיגטע און קאנפירמען וואראנטן. טראמפ האט טאקע אנערקענט די ערנסטקייט פונעם מצב, זאגנדיג: "עס איז נישט גוט. איך גלייך עס נישט," בעפאר ער האט צוגעגעבן זיין האפענונג אז עס קען ארויסברענגען פרישע סודות צום ליכט. כאטש עס איז דערווייל נישט דא קיין שום באווייז אז די העקעריי וועט טאקע אנטדעקן עפעס איבער די רוסלאנד קאלוזשען אדער וואל פעלשונגען, האבן זיינע ווערטער צוריק געברענגט אויפמערקזאמקייט צו זיינע לאנגיעריגע קריטיק קעגן די עף-בי-איי.
דאס איז שוין די צווייטע באריכטעטע סייבער-אטאקע קעגן די עף-בי-איי אין די לעצטע מאנאטן, נאכדעם וואס אין סעפטעמבער האבן העקערס זיך איינגעבראכן אין די ביורא'ס רעקרוטירונג וועבזייטל און באקומען צוטריט צו אינפארמאציע פון ארבעטער און אפליקאנטן. די אויטאריטעטן האבן נאך דערווייל נישט פובליק אידענטיפיצירט די פאראנטווארטליכע פאר די יעצטיגע אטאקע אדער באשטעטיגט פונקטליך וועלכע דאטא איז קאמפראמיטירט געווארן. די אויספארשונג גייט אן אין די צייט וואס באאמטע שאצן אפ די מעגליכע קאנסעקווענצן פון אן אטאקע אויף איינע פון די סענסיטיווסטע פאליצייאישע אינפארמאציע סיסטעמען אין לאנד.