טעראריסט צינדט אונטער א קאר און סטראשעט אידן מיט א מעסער אין בנימין
גאלערי
בחסדי השם: אראבישער טעראריסט נייטראליזירט נאכן אונטערצינדן א קאר און פרובירן צו שטעכן אידן אין בנימין ראיאן
א פאלעסטינער טעראריסט באוואפנט מיט א מעסער האט מאנטאג אנגעווארפן א פחד אויף אידישע איינוואוינער אין 'חוות חנניה' אינעם בנימין ראיאן, נאכדעם וואס ער האט לויט באריכטן אונטערגעצינדן א קאר אויפן פארעם.
לויט די פאליציי, איז דער טעראריסט אריינגעקומען אינעם געגנט מיט א לייטער אין די האנט, און האט עס גענוצט אונטערצוצינדן א קאר וואס באלאנגט פאר די פארעם. ווען די ארטיגע איינוואוינער זענען צוגעקומען צו אים זען וואס גייט פאר, האט ער ארויסגעצויגן א מעסער און אנגעהויבן סטראשען.
די איינוואוינער האבן זיך אבער נישט דערשראקן און האבן אים אנגעהויבן נאכיאגן ווען ער האט פרובירט צו אנטלויפן. אין פרישע ווידעא קליפס וואס זענען פארעפנטליכט געווארן, קען מען זען די דראמאטישע יאגדע, ווי דער טעראריסט פרובירט נאכאמאל און נאכאמאל צו סטראשען די אידן מיט זיין מעסער. צום סוף האט איינער פון די איינוואוינער אים אראפגעקלאפט מיט א קאר, און אים גענצליך נייטראליזירט.
בחסדי השם זענען קיינע פון די אידישע איינוואוינער נישט געשעדיגט געווארן.
פאליציי אפיצירן און אינוועסטיגעיטארס זענען אראפגעקומען אויפן סצענע און געעפנט אן אויספארשונג. די פאליציי האט געפונען דעם מעסער און דעם לייטער וואס דער טעראריסט האט גענוצט ביי די אטאקע. אין די זעלבע צייט האבן זיכערהייט קרעפטן דורכגעפירט א ברייטע זוכונג אינעם ארומיגן געגנט, נאך באריכטן אז א צווייטער פארדעכטיגטער איז מעגליך אנטלאפן פונעם ארט.