וְיִסְּדוּ⁠ הַבֹּנִים אֶת הֵיכַל ה׳!

בלויז 10 טאג אָפּגערוקט פון אנהויבן די אינסטולאַציע פון די מאַסיווע שטאָלענע ביעמס און קאלומס ביים ביהמ״ד הגדול אין קרית יואל, האט מען היינטיגן מאנטאג פ׳ ואתחנן בשעטומ״צ דערגרייכט אַ מיילשטיין אינעם בליץ-שנעלע בוי-פּראָיעקט:

דעם היינטיגן אינדערפרי האָט מען בשעטו"מ געגאָסן די 9,000 סקווער פיס קאָנקריט סלעבּ פונעם גיגאנטישן "היכל האדיר אלטר יחזקאל"!

אַ חשבון פון 15 צעמענט טראָקס האָבן אַריינמאַרשירט אינעם עיר רבתי עם, זיך שטעלנדיג אין די רייע פאָרנט פון ביהמ"ד הגדול, צו גיסן די צעמענט צו פאָרעמען דער נייער גיגאַנטישער היכל האדיר. אַריבער 170 יאַרד קאָנקריט זענען געגאָסן געוואָרן, מיט אַ שיכט פון גאַנצע זעקס אינטשעס דיק, אַז דער היכל האדיר זאָל קענען ריכטיג אָנהאַלטן אַלעס וואָס דער געביידע גייט אַרייננעמען אין זיך.

בעז״ה ענדע וואך וועט די ארבעט פאָראויס מאַרשירן ווען די צווייטע און לעצטע ביעמס שיפּמענט וועלן אַנקערן ביים ביהמ"ד, און פון דאָרט וועט מען בעז"ה גאַלאָפּירן צו ארויפציען די קאלומס אויפצושטעלן די איבריגע טייל פונעם גיגאַנטישן סטרוקטור פונעם הויכשטאקיגן היכל.

גלייכצייטיג איז היינט אָפּגעליפערט געווארן צום שטח הבנוי' ״מעטאל סטאדס״ מיט עטליכע הייב מאשינען, וואָס וועלן ארבעטן מבית ומבחוץ פונעם בנין מיט'ן אינסטאלירן די פרעימינג רינגס אַרום די סטרוקטור.

די "מכונך והיכלך" קאמפיין איז אין פולסטן שוואונג בקרב קהלתינו הקדושה! הונדערטער חברי קהלתינו האבן זיך שוין אנגעשלאסן מיט'ן איינמאָליגן סכום קבוע פון $1200, און בעז"ה וועט דאָס אַרייננעמען כל יחיד ויחיד צו נעמען א טייל אין די היסטאָרישע אינטערנעמונג לרומם קרן קהלתינו הקדושה לעד ולדורות!

שטייענדיג ערב תשעה באב ווען כלל ישראל קוקט ארויס אויף א ישועה געהאלפן ווערן בביאת הגואל ולבנין בית השלישי, האפט מען אַז עתידין בתי כנסיות ובתי מדרשות שתקבע בירושלים בעגלא ובזמן קריב, און דער זכות פון העלפן בויען אַ בית המקדש מעט מקון השראת השכינה זאל ביישטיין אויף אַלע משתתפים לזכות ולראות בשמחתה של ישראל בקרוב בימינו!

מיר זענען אַלע מתפּלל בהודאה על העבר ובקשה על העתיד, שתשרה שכינה במעשי ידיהם, לנצח על מלאכת בית ה' בזמן הקצר בלי שום מפריעה ומניעה ח"ו, להגדיל כח וקרן העיר הקדושה, תרוממנה קרנות צדיק. ויהי נועם ה' אלוקינו עלינו, ומעשה ידינו כוננהו!

בָּנֹה בָנִיתִי בֵּית זְבֻל לָךְ⁠ מָכוֹן לְשִׁבְתְּךָ עוֹלָמִים!