אנגעצויגנקייט צווישן אוקראינע און אילאן מאסק איבער די באנוץ פון 'סטארלינק' סערוויס פאר דראון אטאקעס

אין אן אינטערוויו מיט סי-ען-ען דעם פארגאנגענעם אקטאבער 22, האט דער אוקראינישער פרעזידענט וולאדימיר זעלענסקי ארומגערעדט ווי אזוי אוקראינע קעמפט צוריק קעגן די איראנער-געמאכטע דראונס וואס רוסלאנד נוצט אויפן פראנט. ער האט מסביר געווען אז אוקראינע האט געטראפן א וועג אראפצושיסן די רוסישע דראונס דורך נייע אינטערסעפטאר דראונס, וואס ארבעטן דורך די שנעלע אינטערנעט קאנעקשאן פון 'סטארשילד' - וואס איז די מיליטערישע ווערסיע פון אילאן מאסק'ס 'סטארלינק' סערוויס.

זעלענסקי האט קלארגעשטעלט אינעם אינטערוויו אז אוקראינע נוצט נישט סטארלינק צו אטאקירן רוסישע מיליטערישע אדער ענערגיע צילן, נאר בלויז זיך צו פארטיידיגן פון די דראונס וואס פאלן אויף אוקראינישע שטעט. טראץ דעם, זענען זיינע ווערטער געווארן וויירעל אויפן אינטערנעט מיט קעפלעך אז ער האט כביכול "מודה געווען" אז מען נוצט סטארלינק פאר דראון מלחמות. דאס האט געברענגט א שארפע רעאקציע פון אילאן מאסק, וועלכער האט קלארגעשטעלט אז סטארלינק איז א ריין ציווילע סערוויס וואס טאר נישט גענוצט ווערן פאר אפענסיווע אטאקעס, און אז 'סטארשילד' איז א באזונדערע סיסטעם וואס ווערט קאנטראלירט דורך די אמעריקאנער גאווערנמענט.

שבת האט מאסק גענומען א טריט ווייטער און באשולדיגט אז די אוקראינישע מיליטער האט פארלעצט די עגרימענט פון סטארלינק דורכ'ן עס נוצן פאר אפענסיווע דראון אטאקעס. א ראטגעבער פאר זעלענסקי האט דאס שארף אפגעלייקנט, זאגנדיג אז עס איז פיזיש אוממעגליך פאר אוקראינע צו נוצן די קאמערציאלע סטארלינק פאר מיטל- אדער ווייט-שטרעקיגע אטאקעס, צוליב ספיד רעסטריקשאנס און וויבאלד עס איז בכלל נישט דא קיין סערוויס העכער די רוסישע טעריטאריע.

מאסק האט אבער צוגעגעבן אז סטארלינק בלייבט קריטיש וויכטיג פאר אוקראינע'ס פארטיידיגונג, און אז אן דעם וואלט די פראנט ליין גלייך צוזאמגעפאלן. די אוקראינישע פארטיידיגונגס מיניסטעריום האט געמאלדן אז די פולע ספיד פון סטארלינק און סטארשילד זענען צוריקגעשטעלט געווארן שבת, כאטש זעלענסקי זאגט אז ער ווייסט נישט ווער עס האט פארארדנט די פריערדיגע רעסטריקשאנס. די גאנצע פרשה ברענגט ארויף די פראגע וואו פונקטליך עס ציט זיך די ליניע צווישן ציווילע און מיליטערישע באנוץ, ווער עס האט די מאכט דאס צו באשליסן, און צי אוקראינע קען זיך בכלל פארלאזן אויף א סערוויס וואס זי קאנטראלירט נישט.