הונדערטער משפחות באקומען תשרי עסנווארג פעקלעך ביי די 'חיים בכבוד' חלוקה
גאלערי
ריזיגע חלוקה דורך ארגאניזאציע "חיים בכבוד" אין בני ברק פארטיילט שפע פאר הונדערטער משפחות לקראת חודש תשרי
הונדערטער שטיבער אין שטאט בני ברק האבן באקומען רייכע פוד פעקעדזשעס לקראת די ימי הרחמים והרצון און די קומענדיגע ימים טובים, אלס א טייל פון א מאסיווע חלוקה וואס איז ארגאניזירט געווארן דורך די באקאנטע חיים בכבוד ארגאניזאציע.
די פראיעקט האט צוגעשטעלט שפע פון עסנווארג און אנדערע וויכטיגע געברויכן פאר די ימים טובים, מיטן ציל צו פארזיכערן אז משפחות וואס מוטשען זיך פינאנציעל זאלן קענען אריינגיין אינעם יום טוב מיט א רואיגקייט און מיט אן אמת'ן כבוד יום טוב.
די גרויסע אפעראציע איז אנגעפירט געווארן דורך דעם טשערמאן פון די ארגאניזאציע הרב חיים ישראל ערבליך און דער סי-אי-או הרב שמעון בראמס, נאך לאנגע וואכן פון העפטיגע הכנות צו קענען אהערשטעלן די ריזיגע חלוקה. די פירערשאפט פון די ארגאניזאציע האט ארויסגעברענגט אז זייער ציל איז נישט בלויז צו געבן די מינימאלע הילף, נאר צוצושטעלן א ברייטקייט וואס זאל ערמעגליכן פאר די משפחות צו פראווען די ימים טובים בהרחבה און "בכבוד".
דורכאויס די חלוקה האבן די נשיאים פון די ארגאניזאציע, הגאון ר' שמואל אליעזר שטערן שליט"א און הרה"צ ר' חיים יוסף בידערמאן מלעלאוו שליט"א, אפגעשטאט א באזוך אויפן ארט און באטראכט די מאסיווע הכנות און די פילע סופלייס וואס ווערט פארטיילט פאר די משפחות. די רבנים האבן אנגעוואונטשן ווארימע ברכות פאר די נדבנים און שותפים וואס שטיצן דעם הייליגן פראיעקט.
דער מעיאר פון בני ברק, ר' חנוך זייבערט, האט אויך באזוכט ביי די חלוקה אינאיינעם מיט זיין געהילף ר' יוסי צימעט, און זיי האבן באקומען א ברייטע איבערזיכט איבער די געוואלדיגע אקטיוויטעטן פון די ארגאניזאציע.
אין צוגאב צו די הויפט תשרי חלוקה, האט חיים בכבוד אויך צוגעשטעלט ספעציעלע פוד פעקעדזשעס פאר צענדליגע צובראכענע שטיבער און סינגל-פערענט פאמיליעס דורך איר מלב אל לב אפטיילונג, אין א קאאפעראציע מיט א פארום פון לאקאלע קהילה קאסעס. ווי אויך פירן זיי אן מיט די כתף לילד אפטיילונג וואס שטעלט צו כסדר'דיגע הילף און שטיצע פאר קינדער און משפחות דורכאויס דעם גאנצן יאר.
די מאסיווע חלוקה איז איינע פון די הויפט יערליכע פראיעקטן פון די ארגאניזאציע, אין א צייט וואס די הכנות ווערן פארשטערקערט אין אלע אידישע קהילות לקראת די ימים נוראים און די הייליגע ימים טובים פון חודש תשרי.