חיזבאלא פירער נעים קאסעם רייסט אראפ דעם פרישן אפמאך צווישן לבנון און מדינת ישראל; פאדערט עס זאל אינגאנצן בטל ווערן

דער פירער פון די חיזבאלא טעראר גרופע, נעים קאסעם, האט עפנטליך אפגעווארפן דעם פרישן אפמאך וואס איז געשלאסן געווארן צווישן לבנון און מדינת ישראל, און האט געפאדערט אז מען זאל עס אינגאנצן ארויסווארפן. אין א שארפע סטעיטמענט האט ער דערקלערט: "מיר ווארפן אפ דעם אפמאך מיט מדינת ישראל און מיר פאדערן עס זאל קענסעלד ווערן."

זיינע ווערטער לייגן צו פרישע אנגעצויגנקייט צו די שוין-אזוי-אויך סענסיטיווע פאליטישע מצב אין לבנון, וואו דער דיעל איז אראפגעלייגט געווארן אלס א שריט צו בארואיגן דעם פראנט, אבער טרעפט זיך יעצט אונטער דירעקטע אטאקעס פון איינע פון די מערסט מאכטפולע פראקציעס אינעם לאנד.

קאסעם האט נישט געשוינט קיין ווערטער אראפצורייסן דעם דיעל זעלבסט, אנרופנדיג עס "אומלעגאל און אומדערטרעגליך," און האט טענה'ט אז אנשטאט צו באשיצן לבנון, נעמט עס אוועק זייער זעלבסטשטענדיגקייט. ער האט אויך ספעציפיש קריטיקירט די אזוי-גערופענע "פיילאט זאנעס" וואס זענען אריינגערעכנט אינעם דיעל. לויט אים, איז דער אפמאך נישט קיין דיפלאמאטישע דורכברוך, נאר א פשוט'ע קאפיטולאציע.

אויסער זיין קעגנערשאפט צום אפמאך, האט קאסעם געוואנדן זיין קריטיק דירעקט קעגן די לבנון גאווערנמענט, באשולדיגנדיג די באאמטע אז זיי האבן אויסגעוועלט א וועג וואס ברענגט א שאנדע פאר'ן לאנד. "די לבנון אויטאריטעטן האבן אויסגעקליבן א וועג וואס פארשעמט זיי, פארשעמט לבנון, און איז א שפיי אין פנים פאר די קרבנות פון פאלק," האט ער געזאגט. דאס צייגט אז קאסעם קוקט אן דעם דיעל אלס א דורכפאל פון די פירערשאפט וואס איז ארויפגעצווינגען געווארן פון אויבן, און גייט קעגן די אינטערעסן פון די בירגער.

אין א דירעקטע פאדערונג צו די לבנון פירער, האט ער זיי געפאדערט צו ווייזן כאראקטער אנשטאט זיך אונטערצוגעבן. "זאגטס איין מאל 'ניין'. פרובירט צו ווייזן אז עטס האטס וואס עס פעלט אויס אויפצוטון עפעס אין די צוקונפט," האט ער געזאגט. די ווערטער ווערן אנגעקוקט סיי אלס א שפאט און סיי אלס א שטרענגע ווארענונג, וואס ברענגט ארויף פרישע פראגעס צי דער אפמאך וועט בכלל קענען פאראויסגיין ווי געפלאנט, יעצט ווען די מאכטפולע טעראר גרופע שטעלט זיך ארויס אזוי אפן דערקעגן.