נעכטן זונטאג מיטאג איז פארגעקומען א מסיבת לחיים אין שטוב פון כ”ק אדמו”ר מסאטמאר שליט”א אין קרית יטב לב, לרגל דאס אפקויף פון די שם הבנין פונעם נייעם פראכטפולן הצלה גאראדזש אין שטאט דורך הרבני הנגיד ר’ ישראל חיים בערקאוויטש ני”ו מבוני העיר.

ביים מסיבת לחיים האבן זיך משתתף געווען הנהלת חברת הצלה דקעטסקילס, צווישן זיי הרה”ח ר’ משה נתן בראווער ני”ו פון סענטראל הצלה און הרה”ח ר’ יודל פייג ני”ו איבערגעגעבענע קארדינעיטאר פון קעטסקילס הצלה. ווי אויך מיטגלידער פון די הצלה און שטאט

ר’ יודל האט איבערגעגעבן א באריכט פון די אקטיוויטעטן פון חברה הצלה דורכ’ן יאר ווי אויך די גינסטיגע נייעס אז קעטסקילס הצלה איז געווארען אפראווד פאר א גרענט אויף צוויי שפאגעל נייע אמבולאנסן פאר די לאקאלע הצלה אפעראציעס אין שטאט, די גרענט איז צושטאנד געקומען דורך די לאקאלע אסעמבלי פרוי אינאיינעם מיט די יחד ארגיניזאציע פון שטאט אזוי אויך הרה’’ח יואל גאלד ני’’ו משב”ק מרן ברך משה זצ’’ל.

ר’ ישראל חיים האט ארויסגעברענגט די פאקט, אז מען בויעט די גאראדזש מיט א בליק אויפן עתיד, אז די גאראדזש זאל האבן פלאץ פאר 6 אמבולאנסען אפילו יעצט ברויך מען נאר 2, אבער מיט די ערווארטעטע פלייץ פון נייע דירות, בויעט מען עס יעצט אויף א ברייטע פארנעם.

דערנאך האט מען גע’חתמ’ט די שטרות און די רבי האט ווארעם אנגעווינטשן די נדבן, די הנהלה פון הצלה און עקסטער ווארעם אנגעווינטשען די לאקאלע מעמבערס.