אוקראינע גרייט זיך פאר א דריי-זייטיגע סאמיט מיט אמעריקע און רוסלאנד אין נאוועמבער; מעלאניע טראמפ אינסטרומענטאל אין א לאקאלע פייער-אפשטעל

דער אוקראינישער פרעזידענט וולאדימיר זעלענסקי זאגט אז קיעוו גרייט זיך פאר א דריי-זייטיגע מיטינג מיט די פאראייניגטע שטאטן און רוסלאנד אין די ערשטע העלפט פון נאוועמבער. ביי א געמיינזאמע פרעסע קאנפערענץ אינאיינעם מיטן טערקישן פרעזידענט רעסעפ טאיפ ערדואן אין טערקיי, האט זעלענסקי געזאגט אז די צוויי פירער האבן ארומגערעדט איבער די מעגליכקייטן פון דעם פארמאט, ווי אויך וועגן אריינציען טערקיי און די איבריגע אייראפעאישע לענדער, און די מעגליכקייט פון אפהאלטן די געשפרעכן אין טערקיי.

זעלענסקי האט ארויסגעברענגט אז מען דארף מאכן שטארקע באשלוסן צו ברענגען שלום, און אז מען מוז שיקן קלארע סיגנאלן פאר רוסלאנד אויף יעדן שטאפל אז עס איז נישט דא קיין אנדערע אפציע אויסער שלום, און אז די שטיצע פאר אוקראינע גייט נישט ווערן קלענער. פון די אנדערע זייט האט דער קרעמלין געמאלדן אז זיי פלאנירן זייערע אייגענע געשפרעכן אין אבו דאבי, א לאקאציע וואס זעלענסקי האט דערווייל נישט באשטעטיגט.

אלס א באווייז אז אן אפשוואכונג אין די קריג איז מעגליך, האט זעלענסקי אנגעוויזן אויף א פרישע הומאניטארישע אפעראציע אין אלעשקי, אין די כערסאן ראיאן, וואס צייגט אז ווען מען שטעלט רוסלאנד אין א פאזיציע וואו זיי מוזן נעמען שריט, קען מען זען רעזולטאטן. די אפעראציע איז נאכגעפאלגט א לאקאלע פייער-אפשטעל אינעם רוסיש-אקופירטן שטאט, וואס די ווייסע הויז האט באשטעטיגט אז עס איז צושטאנד געקומען מיט די הילף פון די אמעריקאנער פוירסט לעידי, מעלאניע טראמפ.

טראץ דעם אלעם, האט זעלענסקי קלארגעמאכט אז די צייט פון די געשפרעכן ווענדט זיך אין רוסלאנד, און דער קרעמלין האט שוין געמאלדן אז דאס באנייען די פארהאנדלונגען וועט נישט אפשטעלן זייערע אטאקעס אויף אוקראינע. סענאטאר מארקא רוביא האט אויך די וואך געזאגט אז עס איז דערווייל אומקלאר צי א פארהאנדלטע שלום איז בכלל מעגליך, און אז די מיטינג איז ווייט פון א דורכברוך.

דערווייל בלייבן די הויפט פראגעס צי רוסלאנד וועט זיך בכלל באווייזן צום טיש, וואו די געשפרעכן וועלן פארקומען, און צי א באגרעניצטע פייער-אפשטעל אין איין שטאט קען זיך אויסברייטערן צו עפעס גרעסער.