בס"ד

מאסיווע פארפלייצונגען ביי די בארימטע 'איגואסו' וואסערפאלן; וואסער שטראם גרייכט 8 מאל העכער ווי נארמאל

די 'איגואסו' וואסערפאלן (Iguazu Falls), דער מאסיווער נאטורליכער וואונדער אויפ'ן גרעניץ צווישן ארגענטינע און בראזיל, האט זיך די וואך פארוואנדלט אין א שרעקעדיגע סצענע. שווערע רעגנס אלס רעזולטאט פונעם 'על ניניא' וועטער פענאמען האבן געפירט דערצו אז די וואסער שטראם זאל דערגרייכן צו ארום 12,000 קוביק מעטער א סעקונדע, וואס איז בערך אכט מאל מער פונעם היסטארישן דורכשניט פון 1,500 קוביק מעטער, לויט באריכטן פון 'על דזשאזירא'.

די וואסער פלייץ איז געווארן אזוי עקסטרעם, אז די בראזיליאנער אויטאריטעטן האבן זונטאג פארמאכט די הויפט שפאציר-וועג, באקאנט אלס די 'דעווילס טראוט' (Devil's Throat), און ארבעטער האבן אפילו געמוזט אראפנעמען און אפטיילן שטיקער פונעם בריק כדי די הויכע וואסערן זאלן עס נישט אינגאנצן אוועקשווענקען. אויך אויף די ארגענטינע זייט האט מען געשפירט די קאטאסטראפע, ווען פארק באאמטע האבן מאנטאג אינגאנצן פארשלאסן דעם צוטריט צום פלאץ. כאטש די הויפט טיילן פונעם פארק האבן זיך צוריק געעפנט דינסטאג, איז אבער די 'דעווילס טראוט' בריק געבליבן פארמאכט פאר באזוכער.

די יעצטיגע דראמאטישע סצענעס קומען נישט אינגאנצן אומגעראכטן. שוין צוריק אין אויגוסט האבן די ארגענטינער באאמטע אראפגענומען געוויסע בריקן, פאראויסזעענדיג אז די 'על ניניא' רעגנס וועלן ברענגען שווערע פארפלייצונגען, ענליך אדער אפילו ערגער ווי דאס וואס האט פאסירט אין יאר 2023 ווען טיילן פון די בריק זענען חרוב געווארן.

פארשידענע נייעס קוועלער געבן אן אנדערע ציפערן איבער ווי עקסטרעם די יעצטיגע וואסער-שטראם איז באמת. טייל זאגן אז עס איז 6 מאל די נארמאלע מאס, אנדערע זאגן 8, און טייל שאצן עס אפילו נאנט צו 10 מאל מער, געוואנדן לויט וועלכע בעיסליין מען נוצט. אבער כדי צו באקומען א ריכטיגע בילד: כאטש די יעצטיגע 12,000 קוביק מעטער א סעקונדע איז די העכסטע פאר'ן יאר 2026 ביז יעצט, איז עס נאך אלס ווייט פונעם היסטארישן רעקארד אין יאר 2014. דעמאלטס האט די וואסער דערגרייכט אן אומגלויבליכע 46,000 קוביק מעטער א סעקונדע און אינגאנצן צעשמעטערט די בריקן אויף ביידע זייטן פונעם וואסערפאל.

מיט נאך רעגן אין די וועטער פאראויסזאגונגען, בלייבט די גרויסע פראגע ווי הויך די וואסער וועט נאך קענען שטייגן ביי איינע פון די סאמע הערליכסטע נאטורליכע וואונדער אויף די וועלט.