די וואך דאנערשטאג מיטאג האבן די יונגלעך פון מוסדות מאנטיסעלא געהאט די געוואלדיגע זכיה צו מקבל פנים זיין כ''ק מרן אדמו''ר מסקולען שליט''א ממאנסי, וואס וויילט די טעג אין געגנט. די מעמד קבלת פנים איז פארגעקומען אין די הערליכע לאנטש רום פון די עלעמענטרי סקול וואס דינט אויך פאר אן אולם השמחות לתושבי העיר, און געפינט זיך אינעם איבערגעפרישטן בנין פונעם אור אלטן בית הכנסת תפארת ישראל אויף לענדפיעלד עוו. וואס איז לעצטענס אריבערגעגאנגען צו די בעלות פון די היגע מוסדות הק'. דער רבי שליט''א האט משמיע געווען פייערדיגע דברות קודש פאר די קינדער וועגן די חשיבות פון לערנען תורה בטהרה אפגעזונדערט פון רוישיגע שטאטישע גאסן. דערנאך זענען אלע קלאסן באזונדער אריבערגעגאנגען נעמען לעקאך און א ברכה. דער באזוך האט איבערגעלאזט א מורא'דיגע רושם אויף די קינדער צו דינען דעם אויבערשטען מיט שמחה און חשק.

נאכדעם איז דער רבי שליט''א ארומגעפירט געווארן דורך מנהלי המוסדות איבער דעם היסטארישן שול וואס שטייט שוין זינט יאר תרע''ג ווען יודן בעלי מסירות נפש האבן זיך אוועקגעצויגן פון שטאט כדי צו קענען היטן שבת און יודישקייט. דער רבי האט זיך אויסגעדריקט אז זייער רצון ווערט יעצט טאקע מקוים אין דעם הייליג מקום ווען עס ווערן דא נתחנך יודישע קינדער על דרך ישראל סבא.