שוידערליכע דראון ווידעא צייגט הונדערטער הייפישן שווימען הארט נעבן די ברעגעס אין נארט קאראליינע

אן אויפטרייסלנדע דראון ווידעא האט אויפגעכאפט אן אומגעווענליכע סצענע ווי הונדערטער הייפישן (שארקס) האבן זיך פארזאמלט אין די פלאכע וואסערן הארט נעבן די ברעגעס פון מעיסאנבארא איילענד, אין נארט קאראליינע.

די ווידעא, וואס איז רעקארדירט געווארן דורך עדעם פלאם דעם 15'טן אוגוסט, צייגט ווי הונדערטער, און מעגליך אפילו טויזנטער, הייפישן שווימען ארום אינעם קלארן וואסער. לויט שאצונגען זענען די שארקס בערך 4 ביז 5 פיס לאנג. צום סוף פון די ווידעא קען מען אויך זען א 'רעי' (ray) פיש וואס לייגט צו צום דראמאטישן בילד.

די ריזיגע צאל שארקס האט געצויגן גרויס אויפמערקזאמקייט, ספעציעל וויבאלד זיי געפינען זיך גאר נאנט צום ברעג אנשטאט טיף אינעם אקעאן. דאך זאגן עקספערטן אז דאס איז נישט קיין באווייז אויף אן אומגעווענליכע אינוואזיע אדער א דירעקטע געפאר פאר די וואס גייען צום ביטש. די קאוסטעל וואסערן אין נארט קאראליינע זענען א נאטורליכע וואוינארט פאר אסאך סארטן ים-באשעפענישן, און מעיסאנבארא איילענד אליינס איז א באשיצטע נאטורליכע זאנע וואס איז פיל מיט פארשידענע מינים.

די ווידעא גיט א זעלטענע געלעגנהייט צו זען פון אויבן וואס עס טוט זיך אפ אונטערן וואסער. פון די לופטן קען מען זען ווי די שארקס שווימען אינאיינעם אינעם פלאכן וואסער, וואס מאכט עס אויסזען ווי א ריזיגע לעבעדיגע פאראדע. די בילדער האבן נאטורליך געברענגט מענטשן צו פרעגן פארוואס אזויפיל שארקס האבן זיך פארזאמלט אויף איין פלאץ, און צי מענטשן וואס שווימען אין די געגנט דארפן זיין באזארגט.

ים-עקספערטן און לאקאלע באאמטע באטאנען כסדר אז הייפישן זענען א נאטורליכע טייל פון די נארט קאראליינע עקאסיסטעם. סטעיט באאמטע האבן אויך געבעטן די באזוכער צו רעספעקטירן די נאטור און זיך פירן מיט פאראנטווארטליכקייט ארום דעם אינזל און די ארומיגע וואסערן.

פאר די וואס גייען צום ביטש, איז די ווידעא א שטארקע דערמאנונג אז דער אקעאן הארט נעבן דעם ברעג באהאלט אין זיך פיל מער באשעפענישן ווי מען קען זען פונעם יבשה. כאטש די הונדערטער הייפישן קענען אויסזען שרעקעדיג אויף קעמערע, צייגט עס הויפטזעכטליך די רייכקייט פון די ים-לעבן אין נארט קאראליינע, און נישט אז אן אטאקע איז אויפן וועג. דאך לאזט די אויפטרייסלנדע ווידעא איבער איין שרעקעדיגע פראגע: וויפיל שארקס שווימען באמת ארום הארט נעבן אונז, ווען עס איז נישט דא קיין דראון פון אויבן זיי צו כאפן?