פרעזידענט טראמפ מעלדט פלאן אנצופילן די אמעריקאנער אויל רעזערוון דורך א היסטארישן אפמאך מיט ווענעזועלע

פרעזידענט טראמפ האט געמאלדן פלענער צו נוצן אויל וואס איז פארזיכערט געווארן דורך א נייעם אפמאך מיט ווענעזועלע, כדי אנהייבן צוריק אנצופילן די אמעריקאנער "סטראטעגישע פאטראלעום רעזערוו", וועלכע איז לויט אים איבערגעלאזט געווארן אין א געפארפולע נידריגע שטאפל דורך די פריערדיגע אדמיניסטראציע.

אין א פאוסט אויף סאשעל מידיא האט טראמפ געשריבן אז דער פראצעס פון אנפילן די רעזערוון וועט זיך אנהייבן גאר בקרוב, און ער האט אראפגעלייגט די ווענעזועלע אויל אלס א "מתנה" פון ווענעזועלע פאר'ן אמעריקאנער פאלק. די מעלדונג קומט אין רעזולטאט פון אן אפמאך וואס איז אנטפלעקט געווארן פרייטאג, וואס גיט פאר אמעריקע די מאיאריטעט קאנטראל איבער א געשאצטע 65 ביליאן פאס רעזערוון פון ווענעזועלע אויל. דאס איז א דראמאטישע פארברייטערונג פון אמעריקע'ס איינפלוס אין א לאנד וואס איז לאנגע יארן באטראכט געווארן אלס א קאנקורענט אויף די וועלטליכע ענערגיע מארקעט.

אויסגעליידיגטע רעזערוון

ווי פון ענדע אוגוסט, האלט די סטראטעגישע אויל רעזערוו ביי ארום 290 מיליאן פאס, וואס איז בערך 41 פראצענט פון איר פולע קאפאציטעט פון 714 מיליאן פאס, און שטייט ביי א 44-יעריגע נידריגע שטאפל.

די אויסגעליידיגטע צושטאנד פון די רעזערוון איז א רעזולטאט פון יארן וואס מען האט ארויסגעצויגן אויל אונטער סיי די ביידען און סיי די טראמפ אדמיניסטראציעס, אלס רעאקציע צו א רייע גלאבאלע ענערגיע קריזיסן, אריינגערעכנט די רוסלאנד אינוואזיע אין אוקריינע און די יעצטיגע קאנפליקט מיט איראן. כאטש טראמפ האט ארויפגעלייגט די גאנצע שולד אויף זיין פארגייער, ווייזן רעגירונג דאטא אז די עמערדזשענסי רעזערוון האבן ווייטער געשרומפן אויך אונטער די יעצטיגע אדמיניסטראציע, צייגנדיג אז די רעזערוון דינען אלס א מיטל צו באהאנדלען ענערגיע קריזיסן אומאפהענגיג פון ווער עס זיצט אינעם ווייסן הויז.

דראמאטישע טוישונגען אין ווענעזועלע

דער נייער אפמאך קומט נאך חדשים פון היסטארישע טוישונגען אין די באציאונגען צווישן אמעריקע און ווענעזועלע. דאס האט זיך אנגעהויבן מיט די כאפונג פונעם געוועזענעם ווענעזועלע פירער ניקאלאס מאדורא דורך אמעריקאנער קרעפטן אנהייב יאנואר, און די אריינשטעלונג פון א פראוויזארישע רעגירונג אונטער דעלסי ראדריגעז. באלד נאכדעם האט טראמפ שוין געמאלדן אז ווענעזועלע וועט איבערגעבן צווישן 30 און 50 מיליאן פאס פון פריער-סאנקציאנירטע אויל פאר אמעריקע.

דער נייער אפמאך גייט אבער אסאך ווייטער, געבנדיג אמעריקע קאנטראל אויף איינע פון די גרעסטע אומגענוצטע אויל קוועלער אין די וועלט. גרויסע אמעריקאנער אויל פירמעס, ווי שעווראן (Chevron) און עקסאן-מאביל (ExxonMobil), זענען ערווארטעט צו שפילן א הויפט ראלע אין איבערבויען די צעפאלענע ענערגיע סעקטאר אין ווענעזועלע, כאטש קיין איינע פון די פירמעס האבן נאך נישט ארויסגעגעבן קיין אפיציעלע קאמענטארן דערוועגן.

וועט מען זען ביליגערע פרייזן ביים פאמפ?

עס בלייבט אבער אומקלאר פונקטליך ווי שנעל די נייע אויל וועט אנהייבן פליסן אין די רעזערוון, אדער צי אמעריקאנער דרייווערס וועלן זען א ביליגערע פרייז ביים פאמפ אין די נאענטע צוקונפט. עקספערטן ווארענען אז כדי צו העכערן די אויל פראדוקציע אין ווענעזועלע וועט זיך פאדערן מאסיווע אינוועסטמענטס און אינפראסטרוקטור ארבעט, און עס קען דויערן חדשים אדער יארן ביז מען וועט זען אן ערנסטע טויש, וויבאלד זייער אויל אינפראסטרוקטור איז שטארק נאכגעלאזט.

דערווייל דינט טראמפ'ס מעלדונג אלס א שטארקע פאליטישע סטעיטמענט, צייגנדיג קאנקרעטע רעזולטאטן פון זיין ווענעזועלע פאליסי און געבנדיג א פאזיטיווע מעסעדזש פאר'ן פאלק אז די אמעריקאנער אויל רעזערוון גייען צוריק אנגעפילט ווערן.