פרישע עף-בי-איי דאקומענטן אנטפלעקן וואס דער פאטער פונעם טראמפ אטענטעטער האט דערציילט פאר אויספארשער

נייע עף-בי-איי דאקומענטן וואס זענען יעצט ארויסגעגעבן געווארן, געבן אן אריינבליק אין וואס דער פאטער פון טאמעס קרוקס האט דערציילט פאר די אויספארשער איבער זיין זון'ס אויפפירונג לאנג בעפאר דעם אטענטאט פארזוך אויף דאנאלד טראמפ דעם 13'טן יולי 2024 אין באטלער, פענסילוועניע.

דער פאטער, מעטיו קרוקס, האט אראפגעמאלן זיין זון אלס א שטילער מענטש וואס איז געווען שווער צו לייענען זיינע געפילן, און צייטווייז פלעגט ער אנגרייכן צו מאכן חורבנות ווען עס איז אים געווען לאנגווייליג. ווי עלטער ער איז געווארן, אלס מער איז זיין אינטערעסע אין געווער געשטיגן. איין מאל האט ער אנגעפרעגט ביי זיין טאטן צי ער וועט דארפן אדורכגיין א "בעקגראונד טשעק" צו קענען קויפן זיין 'גלאק' ביקס, א פראגע וואס דער פאטער האט שפעטער באצייכנט אלס זייער מאדנע.

טראץ די אלע צייכנס, האבן די פאמיליע מיטגלידער געזאגט פאר די אויספארשער אז זיי האבן קיינמאל נישט באמערקט קיין קלארע ווארענונג צייכנס וואס זאלן אנצייגן אז קרוקס איז אומשטאנד דורכצופירן אזא ברוטאלע אטאקע.

ווי באקאנט, האט קרוקס דעם טאג פונעם אטענטאט געעפנט פייער ביי א טראמפ ראלי, וואו ער האט פארוואונדעט דעם דעמאלטדיגן קאנדידאט אין די אויער, אומגעברענגט קארי קאמפערעטאר, און שווער פארוואונדעט נאך צוויי אנדערע, בעפאר ער איז דערשאסן געווארן צום טויט דורך א סיקרעט סערוויס סנייפער.

די עף-בי-איי האט שוין פריער געמאלדן אז קרוקס האט גאר פונקטליך געפלאנט די אטאקע, אבער א קלארע מאטיוו איז נאכאלץ נישט באקאנט. די נייע דאקומענטן לייגן טאקע צו מער דעטאלן איבער זיין הינטערגרונט און כאראקטער, אבער עס לאזט נאכאלץ איבער די הויפט פראגעס איבער זיינע מאטיוון אן קיין ענטפער.