וואשינגטאן. – ווייס פרעזידענט דזשעי. די. ווענס האט געגעבן א שטיקל בליק אריינצוקוקן אין די מעגליכע רעפובליקאנער פרעזידענטליכע פארמעסט אין 2028, זאגנדיג אז ער גלייבט אז פרעזידענט דאנאלד טראמפ וועט אים אינדארסירן אויב ער וועט באשליסן צו לויפן.

"איך טראכט אז אויב איך לויף, וועט דער פרעזידענט מיר אינדארסירן," האט ווענס געזאגט. ער האט צוגעלייגט אז כאטש ער האט נאך נישט גערעדט דערוועגן דירעקט מיט טראמפ, ערווארט ער צו באקומען דעם פרעזידענט'ס שטיצע.

דאך האט דער ווייס פרעזידענט אונטערגעשטראכן אז ער האלט נישט אז עס קומט זיך אים אן אינדארסמענט, און ער איז גרייט צו פירן אן אייגענעם קאמפיין אויב נויטיג. ווענס האט אויך מודה געווען אז עס איז מעגליך אז טראמפ וועט אנפאנג בלייבן נייטראל, און לאזן די רעפובליקאנער פריימערי פארמעסט זיך אויסשפילן בעפאר ער מאכט א באשלוס. זיינע ווערטער ברענגען צוריק ארויף אויפ'ן טיש די פראגע איבער ווער עס וועט איבערנעמען טראמפ'ס פלאץ, בפרט יעצט ווען רעפובליקאנער הייבן אן קוקן פאראויס צו די קומענדיגע פרעזידענטליכע וואלן. דערווייל האט ווענס נאך נישט אפיציעל געמאלדן קיין קאנדידאטור פאר 2028, און זיינע ווערטער זענען בלויז זיינע ערווארטונגען און נישט קיין באשטעטיגטע צוזאג פון טראמפ.

אין די זעלבע צייט ווערט דער סעקרעטערי אוו סטעיט, מארקא רוביא, אויך דערמאנט אלס א מעגליכע קאנדידאט פאר די צוקונפט פון די פארטיי. אבער לויט באריכטן האט רוביא אנגעדייט אז ער וועט נישט לויפן קעגן ווענס אויב דער ווייס פרעזידענט שטעלט זיך ארויס אינעם פארמעסט. דאס קען שטארק באאיינפלוסן די רעפובליקאנער פעלד, כאטש עס איז נאך צו פרי צו וויסן ווער עס וועט למעשה לויפן אדער באקומען טראמפ'ס אינדארסמענט.

דערווייל זאגט ווענס אז זיין קאפ ליגט שטארק ביי די 2026 מידטורם עלעקשאנס און צו דעליווערן רעזולטאטן פאר די אדמיניסטראציע, אנשטאט צו אנהייבן א פרעזידענטליכע קאמפיין. די מידטורמס זענען גאר וויכטיג וויבאלד עס וועט אויספרובירן די רעפובליקאנער שטיצע און אויספארעמען דעם פאליטישן קלימאט לקראת 2028.

אן אינדארסמענט פון טראמפ וועט האבן א געוואלדיגע וואג ביי די רעפובליקאנער וויילער, אבער דער פרעזידענט האט דערווייל נאך גארנישט באשטעטיגט. אויף דערווייל צייגט דער ווייס פרעזידענט קאנפידענץ אין זיין נאנטע באציאונג מיט טראמפ, בעת ער לאזט זיינע פרעזידענטליכע אמביציעס אפיציעל אומבאשלאסן.