ערשטמאליגע מסע הקודש ע"י כ"ק אדמו"ר מוויזניץ שליט"א לטובת מוסדותיו הקדושים בוויליאמסבורג גרויס עקסטאז הערשט בקרב תושבי עיה"ת לעיקוואד נאכדעם וואס מען גרייט זיך אויף א היסטארישע ערשטמאליגע וויזניצע שבת אין לעיקוואד. די נסיעה איז היסטאריש סיי מצד תושבי לעיקוואד וואס ווי באקאנט איז די טישן אין וויליאמסבורג געווארן ווי א צענטראלע מקום התרוממות וואס ציעט צו זיך צו הונדערטער תושבי וויליאמסבורג מדי שבת בשבתו וואס קומען זיך אנווארעמען מיט די דערהויבענע טישן און די ווארימע דברי תורה ווי די רבי שליט"א איז מעורר לבבות ישראל, און דעם שבת ויגש וועלן תושבי לעיקוואד צום ערשטן מאל זוכה זיין צו א שבת בצל כ"ק אדמו"ר שליט"א ביי זיי אין שטאט. און אזוי אויך איז די שבת ויגש גאר היסטאריש פאר די הונדערטער חסידי וויזשניץ איבער גרעיטער ניו יארק וואס גרייטן זיך מיטצופארן כדי מיטצוהאלטן די ערשטע מאל זינט כ"ק אדמו"ר שליט"א האט איבערגענומען דעם כתר האדמורות וואס ער פארט אויף א שבת לטובת מוסדותיו הקדושים בוויליאמסבורג. אין אלע וויזניצע צענטערן אין בתי מדרשים אין ניו יארק זענען שוין אפאר וואכן צוריק אויפגעהאנגען געווארן פלאקאטן מיט דעטאלן איבער דעם געפלאנטן דערהויבענעם שבת, אזוי אויך די דעטאלן ווי מ'קען זיך איינשרייבן. די עסקנים ארבעטן איבערמידלעך צו קענען אקאמאדירן דעם גרויסן ציבור וואס האט זיך שוין איינגעשריבן און עס האלט נאר אין איין צוקומען נאך אידן וואס ווילן מיטהאלטן דעם ערשטמאליגן שבת. עס איז אפגעדינגען געווארן די גיגאנטישע אולמי בית פיגא אינעם צענטער פון לעיקוואד וואס איז אויסגעשטאטעט מיט אפגעטיילטע זאלן פאר די תפילות, פאר די סעודות שבת קודש פאר די הונדערטער געסט, און פאר עריכות השלחנות. אזוי אויך וועט צוגעשטעלט ווערן אינעם בנין אליינס הונדערטער בעטן פאר די אורחים, אויסער די פילע דירות און הכנסת אורחים שטיבער וואס ווערן צוגעשטעלט פאר זקנים און אנשים מכובדים. די עסקנים וחברי המוסדות ארבעטן שוין וואכן גרייט צו מאכן דעם באדן. סיי די טעכנישע חלקים און בעיקר די פאנדרעיזינג חלק ווי זיי זענען שוין געזיצן מיט צענדליגע נגידים ונדיבים וואס האבן גאר פאזיטיוו און ווארעם אויפגענומען די עסקנים. יעצט ארבעטן די עסקנים פיבערהאפטיג צו צורישן די לעצט מינוטיגע הכנות ווי אויסשטאטן דאס פלאץ מיט די נויטיגע צוגעהערן צו קענען אקאמאדירן דעם ריזן ציבור די אכסניא פונעם רבי'ן וועט זיין בבית הנגיד ר' יוסף אטלס און נאך שבת וועט די רבי בלייבן ווילן אינעם שטאט לעיקוואד לטובת די מוסדות הקדושים ביז מיטוואך בבית הנגיד ר' יחזקאל מאיראוויטש *לקראת שבת לכו ונלכה*