בס"ד

הונדערטער רבנים, עסקנים און בני משפחה האבן זיך פארזאמלט אפצוגעבן כבוד פאר'ן אנדענק פון הרב משה האוער זצ"ל לקראת זיין ערשטן יארצייט

דינסטאג זענען זיך צוזאמגעקומען א שיינע צאל רבנים, קאמיוניטי פירער, בני משפחה און גוטע פריינט אין די הויפטקווארטירן פון די 'ארטאדאקס יוניאן' (OU) אין מאנהעטן, אפצוגעבן כבוד און זיך מתייחד זיין מיטן אנדענק פון הרב משה האוער זצ"ל, לקראת זיין ערשטן יארצייט וואס פאלט אויס די טעג.

לויט א באריכט פון JNS, האבן זיך ארום 150 מענטשן באטייליגט פערזענליך ביים מעמד, בשעת פילע אנדערע האבן מיטגעהאלטן דורך א לייווסטרים. הרב האוער זצ"ל האט געדינט אלס דער עקזעקיוטיוו ווייס-פרעזידענט פון די OU אנגעהויבן פון יאר 2020 ביז זיין פטירה פאראיאר ביי די 60 יאר.

צווישן די חשוב'ע רעדנער ביים כינוס זענען געווען הרב דזשאש דזשאסעף, דער CEO פון די ארטאדאקס יוניאן; הרב יעקב נויבורגער, ראש ישיבה אין ריעטס און רב פון קהל בית אברהם; הרב שמואל זילבער, דער ניי-געקליבענער עקזעקיוטיוו ווייס-פרעזידענט פון די OU; און דער זון פונעם נפטר, הרב שלמה האוער. 

די מספידים האבן ארויסגעברענגט זיין געוואלדיגע איבערגעגעבנקייט צו תורה, זיין זארג פאר יעדע יחיד, און זיינע יארן פון פירערשאפט למען כלל ישראל. 

דער זון, הרב שלמה האוער, האט דערמאנט זיין טאטנ'ס כח צו טרעפן צייט פאר יעדן יחיד טראץ זיין אנגעצויגענע סדר היום, שילדערנדיג די פערזענליכע קשרים וואס ער האט אנגעהאלטן און די הנאה וואס ער האט געהאט פון שמועסן מיט מענטשן פנים אל פנים. 

הרב נויבורגער האט ארומגערעדט איבער הרב האוער'ס כח צו פאראייניגן פובליק פירערשאפט מיט אן אויסטערלישע עניוות. הרב זילבער האט מיטגעטיילט די השפעה וואס דער נפטר האט געהאט אויף אים במשך מער פון צוויי צענדליג יאר און די לעקציעס וואס ער האט אים געלערנט דורך זיין פערזענליכע ביישפיל.

דורכאויס דעם מעמד איז געוויזן געווארן א ווידעא פרעזענטאציע מיט מאמענטן פון הרב האוער'ס יארן אין די OU, אריינגערעכנט זיינע שמועסן איבער תורה, תפילה און אחדות צווישן אידן.

הרב דזשאש דזשאסעף האט געזאגט פאר די פארזאמלטע אז מען שפירט נאך אלץ הרב האוער'ס השפעה דורך די תורה וואס ער האט געלערנט, די קשרים וואס ער האט געבויט און די ווערדן וואס האבן באגלייט זיין ארבעט. ער האט צוגעגעבן אז פילע מענטשן קומען צו אים כסדר מיט זייערע אייגענע פערזענליכע זכרונות פונעם נפטר, וואס דאס צייגט אויף די ברייטע השפעה וואס ער האט געהאט אויף יחידים איבער די גאנצע קאמיוניטי.

דער מעמד האט זיך געשלאסן מיט א פעסטע אנטשלאסנקייט פון די באטייליגטע ווייטער צו טראגן דעם פאקל פון הרב האוער'ס איבערגעגעבנקייט צו תורה, כלל ישראל און עסקנות, יעצט ווען מען דערנענטערט זיך צום ערשטן יארצייט.