פארלאפענעם דאנערשטאג פ' נצו"י איז פארגעקומען א געהויבענע און היסטארישע מעמד חנוכת הבית פונעם נייעם הערליכן 'רופא חולים' (RCCS) בנין אין צענטער פון ירושלים, בהשתתפות פון צענדליגער גדולי וצדיקי הדור שליט"א, וועלכע זענען געקומען געבן חיזוק און קוראזש פאר די חברי הנהלה, עסקנים און נדבנים פונעם מוסד הק' רופא חולים RCCS. צום היסטארישן מעמד זענען געקומען צו פארן חשוב'ע נגידים פון אמעריקע וועלכע זענען שותפים אין דעם בנין, באזונדער דער פטרון הבנין הרבני הנגיד ר' בערי ווייס נ"י, וואס ער – צוזאמען מיט זיין שוואגער הנגיד ר' ארי ווייס נ"י - האבן איינגעהאנדלט דעם זכות הבנין, אויף וועמענס נאמען דאס בנין, 'בנין משפחת ווייס', ווערט גערופן.   

דורכאויס די דריי שעה פונעם מעמד איז געווען אן אויסטערלישער מחזה צו זען ווי די לאנגע ליסטע פון מרנן ורבנן גדולי וצדיקי הדור שליט"א זענען כסדר ערשינען צו באשיינען דעם אויבנאן. די גדולי ישראל זענען געקומען ארויסווייזן זייער טיפע הכרת הטוב און שעצונג פאר'ן מוסד און די חשוב'ע נדבנים, זייענדיג ליידער פערזענליך באקאנט וואס 'רופא חולים' טוט פאר זייערע אייגענע חסידים, תלמידים ובני קהלתם. טראץ דעם וואס מען האט געהאלטן ערב די ימי הסליחות, האבן די גדולים וצדיקים אוועקגעגעבן פון זייער טייערע צייט כדי ארויסצווייזן הכרת הטוב פאר די הנהלת המוסד ובראשם דער מייסד ויו"ר הרה"ח ר' צבי הערשל הכהן קאהן שליט"א.

דער מעמד האט זיך געענדיגט מיט א הייסע טאנץ באגלייט מיט ווארימע ברכות און תפלות פון די גדולי ישראל, אז דער הייליגער מוסד זאל האבן הצלחה און סייעתא דשמיא, און אז די חולי ישראל ה"י זאלן שוין געהאלפן ווערן מיט א רפואה וישועה בקרוב, אמן.

תחל שנה וברכותיה!