דראמא אין די לופטן: פליגער מיט אידישע סטודענטן מאכט עמערדזשענסי לאנדונג אין פוילן נאך באמבע סטראשע

א 'לאט' (LOT) פוילישע עירליינס פליגער מיט 181 מענטשן דערויף, אריינגערעכנט א גרופע אידישע היי-סקול סטודענטן פון לאנדאן, איז דינסטאג, נאוועמבער 3, פארפירט געווארן צו אן אנדערע עירפארט נעבן ווארשע, נאכדעם וואס א באמבע סטראשע האט געפירט צו אן עמערדזשענסי סעקיוריטי רעספאנס.

דער פליגער, פלייט LO286 וואס איז געפארן פון לאנדאן היטרוי עירפארט צום ווארשע שאפין עירפארט, איז אריבערגעפירט געווארן צום ווארשע-מאדלין עירפארט נאכדעם וואס די אטאריטעטן האבן באקומען א ווארענונג איבער א מעגליכע אויפרייס מאטעריאל אויפן פליגער. לויט די עירפארט באאמטע, איז דער אלארם ארויסגעגעבן געווארן ארום 9:54 אינדערפרי לאקאלע צייט. דער באואינג 737 מעקס פליגער האט געלאנדעט בשלום אין מאדלין זיבן מינוט שפעטער, אום 10:01.

צווישן די פאסאזשירן זענען געווען אידישע סטודענטן אין די יארגאנג פון 16 און 17 יאר אלט פון א לאנדאנער שולע, וועלכע זענען געפארן קיין פוילן אלס טייל פון אן עדיוקעישענאל נסיעה. טייל פון די סטודענטן זענען מדינת ישראל בירגער וואס וואוינען אין לאנדאן.

באלד נאכן לאנדן זענען אלע פאסאזשירן עוואקואירט געווארן פונעם פליגער, בשעת סעקיוריטי פערסאנאל האט דורכגעפירט א גרונטליכע זוכונג. די מאמע פון איינע פון די סטודענטן האט איבערגעגעבן פאר די מדינת ישראל נייעס קוועלע 'וויינעט' (Ynet) אז די פאסאזשירן זענען אראפגענומען געווארן פונעם פליגער אן זייערע פעקלעך און זענען גענומען געווארן פאר א סעקיוריטי סקרינינג. די סטודענטן האבן געזאלט פארזעצן זייער וועג קיין ווארשע מיט א באס.

דער ווארשע-מאדלין עירפארט האט צייטווייליג אפגעשטעלט אלע אפעראציעס בשעת עמערדזשענסי קרעפטן האבן רעאגירט צום סטראשע. די עירפארט אטאריטעטן האבן שפעטער געמאלדן אז די אפעראציעס זענען צוריק צום נארמאלן רוטין נאכדעם וואס די סעקיוריטי טשעקס האבן נישט געפונען קיין שום אויפרייס מאטעריאל.

דער אינצידענט איז געווען א טייל פון א ברייטערע קייט פון באמבע סטראשונגען וואס האבן אנגעמאכט א כאאס פאר אייראפעאישע לופט רייזעס. נאך אן אלארם איז באריכטעט געווארן דינסטאג איבער א סקאנדינאווישע עירליינס פליגער וואס איז געפארן פון קאפנהאגן קיין ווארשע. יענער פליגער האט געלאנדעט אינעם ווארשע שאפין עירפארט ווי געפלאנט און איז אריבער גרונטליכע סעקיוריטי אינספעקציעס, אבער קיין שום באמבע איז נישט געפונען געווארן.

נאך סטראשונגען האבן איבערגעריסן פליגערס אין אנדערע ערטער אין אייראפע, אריינגערעכנט אינצידענטן מיט פליגערס וואס זענען געפארן קיין בולגאריע, איטאליע, און שפאניע. די אינסטאנצן אין די אלע לענדער האבן דורכגעפירט זיכערהייט זוכונגען אלס א פריקאשען, אבער קיין שום אויפרייס מאטעריאל איז נישט געפונען געווארן אין קיין איינע פון די באריכטעטע אינצידענטן. די סעריע פון אלארמען האבן פאראורזאכט פליגער שטערונגען און געפירט צו א פארשטערקערטע סעקיוריטי רעספאנס ביי עטליכע אייראפעאישע עירפארטס.