ספעציעלע באזוך אין מוסדות פאר פראנצויזישע אידן אין ארץ ישראל

אין לויף פון א באזוך אין ארץ ישראל דורך הרה"צ רבי ישכר דוב טויב שליט"א אבד"ק קאלוב וויליאמסבורג, איז דער רב שליט"א ארומגעפארן בשליחות אביו הגדול כ"ק אדמו"ר מקאלוב שליט"א, צו באזוכן די קהילות און מוסדות וואס זענען געווארן אויפגעשטעלט אין לויף פון די לעצטע אכט יאר דורך די "קרן לילדי צרפת".

די קרן איז געווארן אויפגעשטעלט, נאכדעם וואס עס איז פארגעקומען די טעראר-אטאקע ביי די מוסד פון אוצר-התורה אין טולוז-פראנקרייך אין יאר תשע"ב, און די ציוניסטישע סוכנות אנגעהויבן א גרויסע קאמפיין ארויפצוברענגען מאסן אידן פון פראנקרייך קיין ארץ ישראל, און זיי אלע איינגלידערן אין זייער געזעלשאפט.

אין די ערשטע פאר יאר פון די קאמפיין, האבן איבער דרייסיג טויזענט אידן זיך אריבערגעצויגן פון פראנקרייך קיין ארץ ישראל, און די ציונים האבן פארלייגן ספעציעלע סטראטעגישע כוחות, אריינצונארן אלע ילדי צרפת אין די רעגירונג שולעס אין ארץ ישראל, דורך אגענטן מיט קאפלעך וואס זענען געלערנט געווארן איינצורעדן פאר די אומוויסענדע עלטערן אז דאס איז זייער בעסטע אויסוואל.

ערב ראש חודש ניסן תשע"ו, איז פארגעקומען אן היסטארישע אסיפת גדולי ישראל בבית כ"ק אדמו"ר מקאלוב שליט"א אין וויליאמסבורג, וואו עס איז באשלאסן געווארן צו מייסד זיין א "קרן לילדי צרפת" צו באצאלן די פעולות להצלת ילדי צרפת. און עס איז געווארן נאכגעפאלגט מיט עטליכע נסיעות פון כ"ק אדמו"ר מסאטמאר שליט"א צוזאמען מיט גדולי ישראל פון די ליטווישע קרייזן, וועלכע זענען ארומגעפארן שאפן די נויטיגע געלטער פאר די קרן.

די "קרן לילדי צרפת" וואס איז געווארן אויפשטעלט צו ראטעווען די קינדער פון פראנצויזישע אידן פון אריינפאלן אין די פרייע שולעס אין ארץ ישראל, האט שוין באוויזן צו ראטעווען טויזענטער קינדער פון שמד. אסאך פון די געראטעוועטע בחורים שטעלן שוין יעצט אויף אייגענע ערליכע אידישע דורות. אין פיר שטעט אין ארץ ישראל האט זיך אפילו אנטוויקעלט ספעציעלע קהילות פאר די דאזיגע אידן פון פראנקרייך וועלכע האבן באוויזן צו ביישטיין די נסיונות אדאנק די קרן.

איינס פון די הויפט פעולות וואס איז געטון געווארן דורך די קרן, איז דאס אויפשטעלן ספעציעלע חדרים און שולעס פאר די ילדי צרפת, ווי די תלמוד תורה "אורות ישראל" אין נתניה, וואס גיבן יערליך ארויס לעכטיגע פירות פון ערליכע אידן שומרי תורה ומצוות וואס פירן זיך לויט זייער מסורת אבות.

ביי די יעצטיגע געלעגנהייט, האט דער קאלובער רב שליט"א באזוכט די קהילות און מוסדות, וואו ער האט זיך אומגעקוקט אויף די געבענטשטע פירות פון די קרן, און גערעדט דרשות חיזוק, ווי אויך פערזענליך אויפגענומען יעדן איינעם באזונדער, און איבערגעלאזט הויפענעס חיזוק פאר די פילצאליגע אידן פון גרויס ביז קליין.