היסטארישע באזוך: כ"ק אדמו"רים מסאטמאר און אנדערע גדולי ישראל וועלן זיך טרעפן מיט פרעזידענט טראמפ אין ווייסן הויז

א דעלעגאציע פון גדולי ישראל, אנגעפירט דורך די צוויי סאטמארע רבי'ס שליט"א, זענען ערווארטעט אפצוהאלטן א ספעציעלע מיטינג מיט פרעזידענט דאנאלד טראמפ אינעם ווייסן הויז דעם קומענדיגן דאנערשטאג. די אדמו"רים האבן אנגעדייט אז זיי פלאנען ארויפצוברענגען דעם ווייטאגליכן נושא פון גזירת הגיוס און די רדיפות קעגן בני הישיבות אין ארץ ישראל.

די היסטארישע צוזאמקונפט איז געפלאנט אויף 12:30 נאכמיטאג אינעם 'אוועל אפיס' אינעם ווייסן הויז. צווישן די באטייליגטע וועלן זיך ציילן מנהיגי העדה פון עטליכע גרויסע חסידישע הויפן, אריינגערעכנט די אדמו"רים מבאבוב, באבוב-45, וויזשניץ-מאנסי, און ברב"צ רבי אהרן מענדיל שליט"א בבשליחת אביו כ"ק אדמו"ר מסקווירא שליט"א, ווי אויך הגאון ר' אריה מלכיאל קאטלער שליט"א, ראש ישיבת בית מדרש גבוה אין לעיקוואוד.

 א מקור וואס איז באקאנט מיט די פלענער האט אנגעוויזן אז די נושא פון גיוס בני ישיבות איז נישט אפיציעל אויפן אגענדע פונעם מיטינג, און די פלענער קענען זיך נאך טוישן. דאך האבן די סאטמארע רבי'ס געמאלדן פאר חסידים אז זיי פלאנען צו בעטן דעם פרעזידענט'ס הילף אפצושטעלן די ביטערע גזירת הגיוס אויף די לומדי תורה.

ביי די מיטינג איז אויך ערווארטעט אז מען וועט ארומרעדן איבער אנדערע וויכטיגע אישו'ס וואס פלאגן דעם היימישן ציבור אין אמעריקע, אריינגערעכנט די רעגירונג'ס אריינמישונג אין די סעקולערע לימודי חול אין די ישיבות (גזירת החינוך), און אלגעמיינע זארגן איבער רעליגיעזע פרייהייטן.

די געפלאנטע מיטינג האט שוין געצויגן גרויס אינטערעסע, בפרט צוליב די באקאנטע שיטה פון סאטמאר קעגן ציונות און מדינת ישראל. כאטש עס זענען ארומגעפארן קליפס אויף סאושל מידיא ווי דער רבי רעדט שארף קעגן התחברות לטמא, דארף מען אנמערקן אז די ווערטער זענען נישט דוקא געזאגט געווארן אין דירעקטע פארבינדונג מיט דעם קומענדיגן ווייסן הויז באזוך.

די פלאן ארויפצוברענגען דעם נושא פון גיוס גיט א ספעציעלע וויכטיגקייט פארן עולם התורה, אין א צייט וואס די ציוניסטישע אינסטאנצן לייגן אומדערטרעגליכע דרוק און פרובירן צו פארברייטערן דעם גיוס אויף היימישע יונגעלייט.

וויכטיגע נאטיץ: דאס באריכטן נייעס אדער פאליטישע אנאליזן איבער די מדינה באדייט בשום אופן נישט קיין שטיצע פאר זייערע אינסטאנצן. אין איינקלאנג מיט די קלארע פסק פון אונזערע גדולי ישראל און מנהיגי העדה, איז יעדע סארט פשרה אדער מיטארבעט מיט די מיליטערישע אינסטאנצן שטרענג פארבאטן בבחינת יהרג ואל יעבור. מיר בלייבן געטריי צו די קלארע הדרכה פון אונזערע הייליגע רבנים.