אריבער 200 תלמידי סניפי "ישיבה קטנה דרך התורה" מיטגעהאלטען אויסטערליש דערהויבענע שבת התוועדות בראשות ראש הישיבה הגה"צ אבד"ק סאטמאר וויליאמסבורג שליט"א:
![Main image for אריבער 200 תלמידי סניפי "ישיבה קטנה דרך התורה" מיטגעהאלטען אויסטערליש דערהויבענע שבת התוועדות בראשות ראש הישיבה הגה"צ אבד"ק סאטמאר וויליאמסבורג שליט"א:](new_ded_img/24/36/small/8KIWmxYI9bm1kwdXB1d/axsCWbN_long_m.jpg)
ום שבתון אין לשכח, די אריבער צוויי הונדערט תלמידי סניפי ישיבה קטנה דרך התורה האבן פארגאנגענעם שבת מיטגעהאלטען גיסטרייכע דערהויבענע שעה'ן אינאיינעם ביים שבת התוועדות וועלכע איז אפגעראכטען געווארן פאר ביידע סניפי ישיבה קטנה דרך התורה, אין שפיץ פונעם ראש הישיבה הגה"צ אבד"ק סאטמאר וומסב"ג וועלכע האט געפירט דעם גאנצען שבת באש להבה און אריינגעברענגט די תלמידי הישיבה און העכערע ספערן.
ליל שב"ק האט דער רב יורד געווען לפני התיבה צו תפילת מנחה, נאכ'ן גוט שבת זאגן איז דער רב אריינגעקומען בהיכל הביהמ"ד אינעם מחנה צום סעודת ליל שבת קודש, דער רב האט אנגעהויבן די זמירות שבת קודש, און דערנאך קידוש געמאכט מיט גרויס התלהבות און מוציא געווען אלע בחורים. די זמירות שבת קודש האט דער רב אליינס אנגעהויבן, מ'האט געזינגען כל מקדש און מנוחה ושמחה, דערנאך האט דער רב משמיע געווען דברי דרוש ופלפול על הפרשה אין די סוגיא פון מצות עשה שהזמן גרמא. דער רב האט פארציילט עובדות וסיפורים פון הרה"ק מסאטמאר זי"ע לרגל די יארצייט וואס איז אויסגעפאלן דעם פארגאנגענעם פרייטאג - כ"ו אב, און אזוי אויך עובדות וסיפורים פון הרה"ק בעל נועם אליעזר מסקולען זצ"ל. אינדערפרי איז דער רב אריינגעקומען בהיכל הביהמ"ד אין מחנה נייטרא צו תפילת שחרית, דער רב האט יורד געווען לפני התיבה צו תפילת שחרית און פארגעדאווענט מיט גרויס התלהבות. תיכף נאכ'ן דאווענען איז פארגעקומען די קידוש און דערנאך די סעודה.
די קלימאקס פונעם שבת איז געווען בעת רעוא דרעוין וועלכע איז אפגעראכטען געווארן מיט גרויס התעוררות. דער רב האט אנגעהויבן די זמירות שלש סעודות. נאכ'ן זמן ר"ת האט מען אויסגעלאשן די לעקטער אינעם היכל הביהמ''ד, און מען האט פאר א לענגערע צייט ממשיך געווען מיט ניגוני התעוררות. דערנאך האט די רב אנגעהויבן די שלש סעודות תורה וואו דער רב האט פאר א לענגערע צייט ארומגערעדט בדברי מוסר והתעוררות, דער רב האט ארומגערעדט בעניני תשובה ותיקון המעשים, און מיט בכיות ארומגערעדט איבער די ימי הרחמים והרצון הבאים לקראתינו לשלום, שווער האבן זיך די תלמידים געקענט שיידן פון דעם אויסטערליש דערהויבענעם שבת וועלכע בלייבט איינגעקריצט אין די הערצער ביי אלע באטייליגטע.
קרעדיט: אידישע נייעס
גאלערי