היסטארישע און עמאציאנעלע בר מצוה אין מעלבורן: הונדערטער אידן פרייען זיך מיט ספעציעלע בר מצוה בחור ביי א הכנסת ספר תורה

הונדערטער מיטגלידער פון די אידישע קהילה אין מעלבורן, אויסטראליע, זענען זיך צוזאמגעקומען צו אן אויסערגעווענליכע און גאר רירנדע בר מצוה פייערונג פאר דעם 13-יעריגן הבחור מענדי קופער. די שמחה איז געפראוועט געווארן אינאיינעם מיט א געהויבענע מעמד הכנסת ספר תורה, וואס איז געשריבן געווארן ספעציעל לכבודו און איז אריינגעפירט געווארן מיט גרויס פראכט און פרייד אין די גאסן פון די 'מאלבערן' געגנט.

מענדי איז דער זון פון הרב ראובן און מרת מנוחה קופער, שליחים פון חב"ד אין מאלבערן. ער איז געבוירן געווארן מיט 'ענדזשלמאן סינדראם', א זעלטענע גענעטישע צושטאנד וואס לאזט אים נישט רעדן און באגרעניצט שטארק זיין באוועגונג. טראץ די שווערע אומשטענדן, האבן זיינע עלטערן אריינגעלייגט כוחות עצומות דורכאויס זיינע יארן צו פארזיכערן אז ער זאל זיין א פולשטענדיגער טייל פון די אידישע קהילה און חינוך סיסטעם.

דעם 2'טן אוגוסט, א טאג נאכדעם וואס מענדי איז געווארן 13 יאר, האבן זיך ארום 600 מענטשן פון איבער גאנץ מעלבורן אנגעשלאסן אין די גרויסע שמחה. עס איז געווען א מחזה הוד ווען דער חתן הבר מצוה האט שפאצירט אונטער די חופה מיט זיין וואקער, בשעת זיין טאטע האט געטראגן דעם נייעם ספר תורה לעבן אים. דער ריזיגער ציבור האט מיטגעהאלטן מיט פייערדיגע ריקודין און געזאנגען אויפן וועג צום לאקאלן חב"ד צענטער.

די פאמיליע האט שוין יארן לאנג פלאנירט דעם ספר תורה אלס א פאסיגע און באדייטונגספולע וועג צו אפצייכענען זיין בר מצוה. איבער 200 מענטשן האבן זיך באטייליגט אינעם מצוה דורך אפקויפן אותיות, עמודים און פרשיות אינעם נייעם ספר תורה.

אנקומענדיג צום שול, האט מען ארויסגענומען די אלטע ספרי תורה צו אנטקעגן קומען דעם נייעם ספר תורה מיט פרייליכע טענץ, בעפאר עס איז אריינגעלייגט געווארן אינעם ארון קודש.

די שמחה האט זיך שפעטער פארגעזעצט ביי א סעודת בר מצוה מיט די פאמיליע און פריינט. א באזונדערע רירנדע מאמענט איז געווען ווען מענדי האט איבערגעגעבן א דרשה איבער די נצחיות און חשיבות פון די הייליגע תורה, ניצנדיג א ספעציעלע קאמיוניקאציע מאשין וואס ארבעט דורך נאכפאלגן די באוועגונג פון די אויגן.

מענדי לערנט אין די לאקאלע 'ישיבה קאלעדזש' אין מעלבורן, וואו די פאמיליע און די הנהלת המוסד האבן געארבעט האנט-ביי-האנט צו פארזיכערן אז ער זאל קענען מיטהאלטן אינאיינעם מיט די אנדערע קינדער טראץ זיינע באגרעניצונגען. זיין מאמע ניצט אויך איר פערזענליכע איבערלעבעניש צו קעמפן און פארלאנגען אז קינדער מיט ספעציעלע באדערפענישן זאלן ווערן מער אריינגענומען און אקצעפטירט אין די אידישע קהילות.

די געהויבענע בר מצוה און הכנסת ספר תורה האט פארוואנדלט דעם מעסידזש אין א רעאליטעט, ווען הונדערטער אידן זענען זיך צוזאמגעקומען כאיש אחד בלב אחד זיך צו פרייען מיט מענדי און אפגעבן כבוד פאר די הייליגע תורה.