ראוד איילענד: 240 מיליאן דאלער אינוועסטירט אין א נייע "פליענדיגע שיף" טעכנאלאגיע

די ראוד איילענד סטארטאפ קאמפאני "רידזשענט קראפט" (REGENT Craft) האט געמאלדן אז זיי האבן אויפגעטריבן א ריזיגע סומע פון 240 מיליאן דאלער אין פרישע פאנדינג. די נייע אינוועסטמענט ברענגט די טאטאלע קאפיטאל פון די קאמפאני צו 340 מיליאן דאלער.

דער סי-אי-או פון די קאמפאני, בילי טאלעימער, האט איבערגעגעבן אז דאס געלט וועט גיין צו אויסשטאטן א ריזיגע נייע פעקטארי פון 255,000 סקווער פיס, וואס וועט זיין געווידמעט צו פראדוצירן זייערע נייע עלעקטרישע "סי-גליידערס" (seagliders). די ערשטע דעליוועריס פאר קאסטומערס זענען געפלאנט צו אנהייבן ענדע יאר 2027.

וואס איז דאס א סי-גליידער?

עס רעדט זיך פון אן אינאוואטיווע עלעקטרישע פארמיטל וואס איז געבויט צו ארבעטן אין דריי פאזעס: קודם שווימט עס אויפ'ן וואסער ווי א געווענליכע שיף, דערנאך הייבט עס זיך אביסל העכער אויף ספעציעלע רעלסן, און צום סוף פליט עס ממש העכער די כוואליעס פונעם וואסער. די טעכנאלאגיע ערלויבט צו פארן אויפ'ן וואסער מיט א געוואלדיגע שנעלקייט, אן די געברויך פון א ראנוועי אדער א טיפע פארט. עס איז ערווארטעט צו זיין פיל ביליגער צו אפערירן ווי א געווענליכע פליגער אדער א פעררי שיף.

די פרישע אינוועסטמענט קומט פון א רייע גרויסע אינוועסטארס און בענק, אריינגערעכנט די באקאנטע דעפענס קאמפאני "לאקהיד מארטין" און אנדערע פירמעס וואס זוכן צו אינוועסטירין אין פארגעשריטענע טראנספארטאציע. די פראיעקט האט שוין געצויגן שטארקע אינטערעסע סיי פון קאמערציאלע קאמפאניס און סיי פונעם מיליטער.

די קאמפאני האלט שוין ביי א 15 מיליאן דאלער קאנטראקט מיט די אמעריקאנער מארינען (Marine Corps) פאר לאדזשיסטיקס און מעדיצינישע עוואקואציעס. ווי אויך האבן זיי שוין באקומען ארדערס פון קאסטומערס איבער זעקס קאנטינענטן, וואס זעען דערין א פראקטישע לעזונג פאר שנעלע טראנספארטאציע אויפ'ן וואסער.

די נייע פעקטארי אין ראוד איילענד וועט דינען אלס דער הויפט צענטער צו אריבערגיין פון מאכן בלויז פראטאטייפס צו א מאסיווע פראדוקציע. מיט די פרישע 240 מיליאן דאלער אין די קאסע, האפט די קאמפאני צו קענען דעליווערן די ערשטע מאדעלן אין צייט. אויב אלץ גייט לויט'ן פלאן, וועט מען שוין אין די קומענדיגע צוויי יאר קענען זען די פליענדיגע שיפלעך אויף די וואסערן, סיי פאר מיליטערישע געברויכן און סיי פאר פאסאזשירן.