צה"ל עלימינירט הויכראנגיקן כאמאס קאמאנדיר פון די 'נוכבא' קראפטן וועלכער האט אנטיילגענומען אין די שמחת תורה אטאקעס

די מדינת ישראל מיליטער האט פרייטאג געמאלדן אז זיי האבן סוקסעספול עלימינירט מאהער וואליד אומאר אל-כוסעיני, א צעל-קאמאנדיר אין די עליטע 'נוכבא' קראפטן פון כאמאס, דורכאויס א לופט-אטאקע וואס איז פארגעקומען מיטוואך אין דרום עזה.

לויט די מיליטער, האט דער טעראריסט אקטיוו אנטיילגענומען אין די בלוטיגע שמחת תורה אטאקעס אום אקטאבער 7, 2023, ספעציפיש ביי די אטאקע אויף די 'רעים' מיליטערישע באזע - די הויפטקווארטיר פון די עזה דיוויזיע - וואו כאמאס קעמפער האבן אומגעברענגט 19 מדינת ישראל זעלנער אין לויף פון עטליכע שעה פון שווערע פייער-אויסטוישן.

די מיליטער גיט איבער אז ער האט נישט אויפגעגעבן זיינע טעראר אקטיוויטעטן נאכן אויסברוך פון די מלחמה. צה"ל זאגט אז אין די לעצטע תקופה האט ער פלאנירט פרישע אטאקעס קעגן זעלנער און ציווילע בירגער, און האט פרובירט צוריק אויפצובויען די מיליטערישע מעגליכקייטן פון כאמאס, וואס דאס ווערט באטראכט ווי א דירעקטע און סיסטעמאטישע פארלעצונג פונעם יעצטיגן פייער-אפשטעל.

צה"ל האט אונטערגעשטראכן אז זיי האבן גענומען עטליכע שריט צו פארמיידן ציווילע פאטאליטעטן בעפאר די אטאקע, אריינגערעכנט דאס נוצן פרעציזע וואפן און לופט-אבזערוואציעס. זיי האבן אויך קלארגעשטעלט אז די טרופן בלייבן סטאנציאנירט אינעם ראיאן אונטער די פייער-אפשטעל אפמאך, און וועלן ווייטער רעאגירן צו סיי וועלכע פרישע סטראשע.

די מעלדונג קומט נאך צוויי אנדערע לופט-אטאקעס אין עזה וואס זענען פארגעקומען דאנערשטאג, וואו די מיליטער זאגט אז זיי האבן אומגעברענגט נאך א כאמאס קאמאנדיר וואס האט אנטיילגענומען אין די שמחת תורה אטאקעס, ווי אויך א מיטגליד פון די 'פאלעסטינער איסלאמישע דזשיהאד' טעראר גרופע. אין די לעצטע מאנאטן האט מדינת ישראל שטארק פארמערט אירע געצילטע אטאקעס קעגן די וואס זענען געווען פארמישט אין די אקטאבער 7 אטאקעס.

די פרישע אטאקעס ברענגען ארויף ערנסטע פראגעס איבער ווי לאנג דער פייער-אפשטעל וועט זיך קענען האלטן, בעת ביידע זייטן באשולדיגן איינער דעם צווייטן אין אונטערגראבן דעם אפמאך.