סידני, אויסטראליע. א גאר באדייטנדע אורטייל איז די וואך ארויסגעקומען פונעם העכסטן געריכט אין ניו סאוט וועילס, וואו ריכטער דעסמאנד פאגאן האט גאר קלאר ארויסגעברענגט אז אנטי ציוניזם, אדער קריטיקירן ציוניזם און מדינת ישראל, קען נישט דערפאר אליין באטראכט ווערן אלס אנטיסעמיטיזם.

דער אורטייל איז געגעבן געווארן אין דעם געריכטליכן פאל State of New South Wales v Farhat, וואו עס איז צווישן אנדערע ארויפגעקומען די פראגע צי אויסדרוקן קעגן מדינת ישראל דארפן באטראכט ווערן אלס אנטיסעמיטיש.

אין זיין אורטייל שרייבט דער ריכטער גאר קלאר אז ציוניזם איז אן אידעאלאגיע פון אידישן נאציאנאליזם, און איז דעריבער, אזוי ווי אנדערע פאליטישע אידעאלאגיעס, אפן צו דיסקוסיע און קריטיק.

דער ריכטער באציט זיך אויך צו דעם טענה אז פאר א גרויסן טייל פון די אידן אין אויסטראליע איז ציוניזם געווארן א טייל פון זייער אידענטיטעט. אבער, זאגט דער ריכטער, דאס מאכט נאכנישט אז איינער וואס איז קעגן ציוניזם זאל דערפאר ווערן אנגערופן אן אנטיסעמיט.

א מענטש קען זיין קעגן די ציוניסטישע אידעאלאגיע אן צו האבן קיין פיינטשאפט צו אידן צוליב זייער אידישקייט.

דער ריכטער פרעגט גאר שארף, וויאזוי קען מען זאגן אז קריטיק קעגן ציוניזם איז פיינטשאפט קעגן אידן אלס אידן, ווען אפילו לויט די וואס זאגן אז ציוניזם איז א וויכטיגער טייל פון אידישער אידענטיטעט, זענען נישט אלע אידן ציוניסטן?

דער אורטייל מאכט אויך א קלארן חילוק צווישן כלל ישראל און מדינת ישראל.

אידן וואוינען איבער דער גאנצער וועלט, מיט פארשידענע השקפות און מיינונגען. מדינת ישראל, פון דער אנדערער זייט, איז א מדינה מיט איר אייגענע רעגירונג, פאליטיק און החלטות.

דעריבער, שרייבט דער ריכטער, קען מען נישט גלייכשטעלן קריטיק אדער אפילו שטארקע קעגנערשאפט צו מדינת ישראל מיט פיינטשאפט קעגן אידן.

דער ריכטער דערמאנט אויך אז עס זענען פאראן אידן וועלכע זענען זעלבסט שטארקע קריטיקער פון מדינת ישראל. ער פרעגט דעריבער וויאזוי קריטיק קעגן מדינת ישראל קען אליין ווערן אנגערופן אנטיסעמיטיזם, ווען אזעלכע מיינונגען ווערן אויך געהאלטן דורך אידן זעלבסט.

באזונדער שטארק זענען די ווערטער פונעם ריכטער בנוגע אנטי ציוניזם. ער שרייבט אז אפילו אויב רוב אידן זאלן זיך אידענטיפיצירן מיט ציוניזם, מיינט דאס נישט אז אנטי ציוניסטן זענען פיינט צו די אידן צוליב זייער אידישקייט. זיי קענען פשוט זיין קעגן די פאליטישע אידעאלאגיע מיט וועלכער יענע אידן האבן זיך פארבונדן.

דער אורטייל איז ספעציעל באדייטנד אין די יעצטיגע צייט, ווען אין אויסטראליע ווערט געפירט א ברייטע דעבאטע איבער וואס עס דארף ווערן באטראכט אלס אנטיסעמיטיזם, און צי קריטיק קעגן ציוניזם אדער מדינת ישראל זאל אריינגערעכנט ווערן דערין.

פאר היימישע  אידן איז דער חילוק אוודאי נישט קיין נייע זאך.

שוין דורות לאנג זענען פאראן גדולי ישראל און גאנצע קהילות פון ערליכע אידן וועלכע האבן זיך שארף קעגנגעשטעלט צו דער ציוניסטישער שיטה מטעמים פון תורה והשקפה, אן דעם וואס זייער אידישקייט אדער זייער אהבת ישראל זאל דערמיט האבן סיי וועלכן שייכות.

דער יעצטיגער אורטייל פון אן אויסטראלישן העכסטן געריכט ברענגט אבער דעם יסודות'דיגן חילוק ארויס אויך אינעם אלגעמיינעם געריכטליכן שמועס:

אנטי ציוניזם און אנטיסעמיטיזם זענען נישט איינס און דאס זעלבע.

דער אורטייל איז ארויסגעגעבן געווארן מאנטאג, דעם 17טן אויגוסט 2026, דורך ריכטער דעסמאנד פאגאן פונעם Supreme Court of New South Wales.

https://www.caselaw.nsw.gov.au/decision/1a00e6b4787e30be37fd7ccd