"א ממש'דיגע נס אויפ'ן מיסיסיפי": פרישע ווידעא צייגט דעם מאמענט ווי א ריזיגע טענקער קראכט אריין אין א פאסאזשירן שיף אין ניו ארלינס

א נייע ווידעא רעקארדירט דורך א פאסאזשיר אויפ'ן "אמעריקאן העריטעדזש" קרוז שיף, צייגט די שרעקליכע סעקונדעס ווי דער "אטלאנטיק אספאלט" טענקער פארט גראד אריין אינעם שיף אויפ'ן מיסיסיפי טייך אין ניו ארלינס. די ווידעא איז אומקלאר און שאקלט זיך, און מען קען הערן ווי איינער שרייט "האלט דיך אן" ווען מען זעט שוין אז דער קראך איז אומפארמיידבאר.

דער אינצידענט האט פאסירט פרייטאג, נאוועמבער 13, 2026, ארום 12:30 נאכמיטאג, בשעת די שיף איז געווען געפארקט ביים 'פארט אוו ניו ארלינס' און פאסאזשירן האבן געהאלטן אינמיטן אראפגיין.

באאמטע געבן איבער אז דער טענקער האט פארלוירן קאנטראל און אריינגעקראכט אינעם שיף, וואס האט באלד אנגעהויבן ארייננעמען וואסער, איז טיילווייז געזונקען און דערנאך זיך איבערגעדרייט. די קאוסט גארד זאגט אז עס איז מעגליך אז דער טענקער האט פארלוירן די סטירינג קאנטראל, און א לאקאלע טייך-פילאט איז געווען ביים רעדל.

קרוב צו 200 מענטשן זענען געווען אויפ'ן שיף אדער אינעם אומגעגנט אין די צייט פונעם קראך, און טייל פאסאזשירן זענען שוין אראפגעגאנגען בעפאר. א שנעלע רעטונגס אפעראציע פון עטליכע אגענטורן אינאיינעם האט באלד נאכגעפאלגט. פייערלעשער האבן גענוצט לייטערס העכער'ן דאק, און אנדערע שיפלעך אויפ'ן טייך האבן געהאלפן ארויסשלעפן מענטשן פון וואסער. אלע פאסאזשירן זענען געטראפן געווארן, און 32 מענטשן זענען אפגעפירט געווארן אין שפיטאל מיט לייכטע וואונדן.

דער לואיזיאנא גאווערנאר דזשעף לענדרי האט רעאגירט צום רעזולטאט זאגנדיג אז דאס איז "א ממש'דיגע נס אויפ'ן מיסיסיפי." די אורזאך פונעם עקסידענט ווערט נאך אויסגעפארשט, און די NTSB אגענטור פירט אן אויספארשונג איבער דעם קראך. באאמטע זאגן אז עס קען נעמען עטליכע וואכן ביז מען וועט קענען ארויסשלעפן דעם "אמעריקאן העריטעדזש" שיף פונעם טייך.