חסידי וויזניץ אין מאנטריאל זענען איינגעהילט אין פרייד מיט די הרחבת גבולי הקדושה, ווען אין די יעצטיגע טעג איז די הנהלת המוסדות אריין אין קאנטראקט אפצוקויפן א פרישע געביידע פאר די מוסדות הקדושים, בברכתו ובעידודו פונעם נשיא המוסדות כ"ק אדמו"ר מוויזניץ שליט"א פון מאנטריאל.

די וויזניצע מוסדות אין שטאט וואס איז נאכנישט קיין צוואנציג יאר אלט, האט אין די לעצטע פאר יאר זיך דראסטיש צושפרייט און צעוואקסן, סיי די תלמוד תורה און סיי די מיידל שולע, און סיי די ישיבה קטנה "אמונת מרדכי" וואס גייט שוין אן איבער צוויי יאר ב"ה מיט גרויס הצלחה.

די תלמוד תורה און די מיידל שולע זענען אצינד איינקוואטירט אין איין געביידע, וואס איז ווי פארשטענדליך היבש שווער פאר די ווייטערדיגע בליה און וואוקס אין די מוסדות הקדושים, סיי ברוחניות און סיי בגשמיות, אצינד איז די הנהלת המוסדות אריין אין קאנטראקט אפצוקויפן א פרישע געביידע אויף די סעינט אורבאן גאס אין מאנטריאל, וואס וועט בעז"ה צוברענגען גרויס הרחבת הדעת פאר אלע אפטיילונגען אין די מוסדות.