מאנטשעסטער. — צוויי יוגנטליכע וועלכע זענען ארעסטירט געווארן אין א אידישע געגנט אין סאלפארד, בשעת זיי האבן געטראגן אויף זיך א מעסער, א האמער, פייער-צינדער פליסיגקייט און ספעי-פעינט, וועלן פארבלייבן אין קאסטעדי, בעת די קאונטער-טעראריזם פאליציי פירט אן אן אויספארשונג איבער דעם פאל.

די צוויי, הארלי עליאט און מעקענזי סמיט, ביידע 19 יאר אלט, זענען ארעסטירט געווארן נאכדעם וואס די פאליציי האט רעאגירט צו רופן איבער צוויי פארשוינען וואס האבן זיך געדרייט אויף א פארדעכטיגטן אופן אין די אידישע געגנט אין סאלפארד, אין די פריע פארטאגס שטונדן פון סעפטעמבער 6.

לויט די קלאגעס, האבן די צוויי פארמאגט אויף זיך שעדליכע וואפן — א האמער און א קאך-מעסער — ווי אויך ספרעי-פעינט און פייער מאטעריאלן, וואס איז לויט די פאליציי געווען געצילט צו אונטערצינדן אדער פאראורזאכן ערנסטע שאדנס צו לאקאלע פארמעגנס.

די 'קאונטער טעראריזם פאליציי נארט-וועסט' אפטיילונג פירט אן די אויספארשונג אינאיינעם מיט די לאקאלע 'גרעיטער מאנטשעסטער פאליציי'. די אויטאריטעטן האבן דערווייל נאכנישט אפיציעל באשטעטיגט וואס דער מאטיוו אונטער דעם איז געווען, און די אויספארשונג גייט אן אין פולן שוואונג.

די פארדעכטיגטע זענען ערשינען פארן מאנטשעסטער קאורט, וואו דער ריכטער האט פארארדנט אז זיי זאלן ווייטער געהאלטן ווערן אין ארעסט פאר נאך זיבן טעג. דורכאויס דעם פארהער האבן זיי נישט אריינגעגעבן קיין אפיציעלע ענטפער צו די קלאגעס און האבן נישט פארלאנגט צו ווערן באפרייט אויף בעיל. זיי דארפן צוריקקומען אין קאורט דעם קומענדיגן סעפטעמבער 21.