אראבישע בייזוויליגקייט אין בנימין: 9 שאף און א פאסטוך-הונט געשטארבן נאכן טרינקען פון א פארסמ'טע וואסער-טראג

ניין שאף און א פאסטוך-הונט זענען דינסטאג אומגעקומען נאכדעם וואס זיי האבן געטרונקען פון א וואסער-טראג וואס איז בייזוויליג פארסמ'ט געווארן אין די פאשע-פעלדער נעבן די 'אלון ראוד' אין די בנימין ראיאן.

איבער 40 אנדערע שאף זענען אויך שווער געשעדיגט געווארן פונעם סם. לאקאלע איינוואוינער זענען געלאפן צום סצענע מיט ספעציעלע וועטערינאר מעדיצינען אין א פארזוך צו ראטעווען די איבערגעבליבענע שאף. ווי מען גיט איבער, האבן צענדליגע שאף אנגעהויבן שפירן זייער שלעכט און געוויזן שווערע סימפטאמען קורצע צייט נאכן טרינקען פונעם פארסמ'טן וואסער. דער הונט וואס האט באגלייט די טשערעדע האט אויך געטרונקען פונעם קאנטאמינירטן וואסער און איז געשטארבן קורץ דערנאך.

לויט ווי ארטיגע איינוואוינער זאגן, זענען פארשוינען געקומען פונעם דערנעבנדיגן אראבישן דארף 'אל-מוגייר', אריינגעקומען אינעם פאשע-פעלד און אריינגעגאסן א גיפטיגע סובסטאנץ אינעם וואסער-טראג. זיכערהייט קרעפטן און פאליציי זענען אראפגערופן געווארן צום סצענע און האבן אנגעהויבן א ברייטע זוכונג נאך די פארדעכטיגטע.

איינוואוינער ווייזן אן אז דער יעצטיגער אינצידענט קומט נאך א רייע ענליכע פארסמונגען וואס זענען דורכגעפירט געווארן קעגן שאף און בהמות אין די פאשע-פעלדער לענגאויס די 'אלון ראוד' דורכאויס דעם פארגאנגענעם יאר. אין פריערדיגע פעלער האבן די אראבער אריינגעלייגט סם אין די וואסער קוועלער אדער עס באהאלטן אין די עסן וואס איז צעווארפן געווארן אין די פעלדער.

דער דינסטאגדיגער אינצידענט ווערט באטראכט אלס גאר א שווערע, צוליב די גרויסע צאל חיות וואס זענען געשעדיגט געווארן אויף איין מאל. דערווייל גייען נאך אן די באמיאונגען אויפן ארט צו באהאנדלען און ראטעווען די איבערגעבליבענע שאף.