בס"ד

דראמא אויף א יונייטעד עירליינס פלייט: אימיגראנט סטראשעט מיט א באמבע און פרובירט אריינצוברעכן אינעם קאקפיט

א יונייטעד עירליינס פלייט (פלייט 2174) וואס איז געפארן פון ניוארק קיין ניו ארלינס מאנטאג נאכט, נאוועמבער 9, האט זיך פארוואנדלט אין א שרעקעדיגע עמערדזשענסי, ווען א פאסאזשיר האט אנגעהויבן ווילדעווען און געסטראשעט אז ער האט א באמבע. אויפן פליגער זענען געווען 46 פאסאזשירן און 6 מאנשאפט מיטגלידער.

לויט די אטאריטעטן, האט דער 34-יעריגער ראני אלעקסאנדער גאמעז-אלבערטא אנגעהויבן זיך אויפצופירן אומנארמאל, און האט געזאגט פאר די פלייט אטענדענטס אז ער פארמאגט א באמבע. די 'דעפארטמענט אף האומלענד סעקיוריטי' (DHS) זאגט אז ער האט אויך פרובירט אריינצוברעכן אינעם קאקפיט. די פילאטן האבן תיכף ארויסגעשיקט א 'היידזשעקינג' אלארם, און דער פארשוין איז געהאלטן געווארן אונטער קאנטראל אינעם אונטערשטן טייל פונעם פליגער ביז מען האט ב"ה געלאנדעט אומגעשעדיגט אין ניו ארלינס, וואו די דזשעפערסאן פעריש פאליציי האט אים ארעסטירט אן קיין קעגנשטעל.

גאמעז-אלבערטא איז אנגעקלאגט געווארן אויף קלאגעס פון איבערגעבן פאלשע אינפארמאציע איבער א פלאנירטע אטאקע און טעראריזירן, און ער ווערט געהאלטן אן קיין בעיל (באנד). די האומלענד סעקיוריטי דעפארטמענט גיט איבער אז ער איז א בירגער פון האנדוראס וועלכער איז שוין געכאפט געווארן נאכן אריינקומען קיין אמעריקע אומלעגאל אין 2011 און אין 2014, און איז דעפארטירט געווארן ביידע מאל. די אגענטור זאגט אז 'אייס' (ICE) האט אים באפרייט אין יאנואר 2020 נאכדעם וואס אן אימיגראציע ריכטער האט פארארדנט זיין באפרייאונג אינדערצייט וואס זיין דעפארטאציע פראצעדור איז נאך אנגעגאנגען. אצינד האט 'אייס' ארויפגעשטעלט א דיטעינער אויף אים דעם 10'טן נאוועמבער.

זיין קרימינאלע רעקארד איז נישט קיין ריינע; עס נעמט אריין ערנסטע קלאגעס (פעלעניס) פון באמבע סטראשונגען, טעראריסטישע סטראשונגען און ווילדע אויפפירונג. דערווייל זענען דאס בלויז באשולדיגונגען וואס זענען נאך נישט באשטעטיגט געווארן אין געריכט, און די באריכטן גיבן דערווייל נישט אן קיין מאטיוו וואס האט געפירט צו זיין ווילדע אויסברוך אויפן פליגער.