אפטרעטנדער יו-ען סעקרעטאר גענעראל ווארנט: די וועלט געפינט זיך אין א כאאס און די יו-ען איז פאראליזירט

דער אפטרעטנדער יו-ען סעקרעטאר גענעראל, אנטאניא גוטערעס, האט די וואך ארויסגעגעבן א שארפע ווארענונג, זאגנדיג אז די וועלט איז פארכאפט אין א דראמאטישע געא-פאליטישע צעטיילונג וואס האט אינגאנצן פאראליזירט דעם 'סעקיוריטי קאנסיל'. ער האט דירעקט אנגעוויזן אויף די גרויסע "סופערפאוערס", זאגנדיג אז טייל פון זיי האבן זיך אריינגעלאזט אין מלחמות וואס ברעכן אינטערנאציאנאלע געזעצן, און לויט אים, האט דאס באשאפן א קלימאט פון הפקרות וואס שפרייט זיך אויס פיל ווייטער פון זיי.

איינמאל די גרויסע שפילער הייבן אן איגנארירן די רעגולאציעס, זאגט ער, הייבן די מיטלגאטיגע לענדער אן צו שפירן אז זיי קענען זיך אויך פירן מיט די זעלבע חוצפה, זייענדיג זיכער אז קיינער וועט זיי גארנישט טון דערפאר. דער רעזולטאט איז, לויט גוטערעס, א וועלט וואו מלחמות און קאנפליקטן ווערן נישט נאר מער און מער, נאר זיי ווערן פיל מער פארפלאנטערט פון טאג צו טאג.

גוטערעס קומט ארויס מיט די ווערטער בעת ער גרייט זיך צו פארלאזן זיין אמט נאך יארן לאנג פירן די ארגאניזאציע, וואס ער אליין גיט צו אז זי פלאגט זיך צו האלטן קאנטראל אין א צעפאלענע וועלט. ער האט עטליכע מאל ארויסגעברענגט רוסלאנד'ס אינוואזיע אין אוקריינא און די לעצטיגע אמעריקאנער אטאקעס אויף איראן - ביידע דורכגעפירט דורך לענדער וואס האבן א 'וועטא' קראפט אינעם סעקיוריטי קאנסיל - אלס הויפט ביישפילן פון די הפקרות קעגן וואס ער ווארנט.

דער צוזאמברוך, טענה'ט ער, האט איבערגעלאזט די יו-ען אן קיין שום עכטע קראפט אדער השפעה צו טוישן די רעזולטאטן אין די גרעסטע קאנפליקטן איבער די וועלט, אנגעהויבן פון אוקריינא ביזן מיטל מזרח. זיין מעסעדזש איז למעשה א פאדערונג פאר א דראסטישע רעפארם, רופנדיג די וועלט פירער איבערצובויען דעם אינטערנאציאנאלן סיסטעם וואס זאל קענען האלטן לענדער פאראנטווארטליך, בעפאר נאך לענדער באשליסן אז די געזעצן זענען פשוט מער נישט גילטיג פאר זיי.