נאך לאנגע יארן פון גאר שווערע הארעוואניע און גאר אסאך געלט. האלט מען שוין דא אז די עירוב אין קאסא גראנדע איז שוין אויפגעשטעלט לשם ולתפארת מיט אלע הידורים וואס מען פראבירט נאכצוקומען אין די חסידישע מקומות ווי מאנסי אדער קרית יואל אא"וו.

די עירוב איז געווען די איניטיעטיוו פונעם מייסד היישוב הרב יהושע רובין וועלעכע האט געספאנסערט די ארום $50,000 פאר די עירוב.

און מיט די שווערע ארבייט שלא על מנת לקבל פרס פונעם חשוב'ן עסקן לכל דבר שבקדושה הר"ר יצחק גרין הי"ו, וועלעכע האט אריינגעלייגט לילות כימים פאר כמעט דריי יאר אז די עירוב זאל צושטאנד קומען און יעצט איז ער ברוך ה'מברך על המוגמר.

אינאיינעם מיט הרה"ג רבי יצחק אייזיק בערגער דומ"ץ קהל חסידים ד'קאסא גראנדע אריזאנע, וועלעכע האט אים באגלייט די גאנצע צייט מיט די הלכהד'יגע דעטאלן און גאר אסאך כוחות אריינגעלייגט אז די עירוב זאל זיין בתכלית ההידור.

אויך הרה"ג רבי שמעון אברהם אינדיג שליט"א אבד"ק ריבאטיטש, איז געווען כסדר אין פארבינדונג מיט עצות און ענטפערן הלכהד'יגע שאלות וויאזוי צו מאכן די עירוב און איז עטליכע מאל געקומען צו פארן קיין קאסא גראנדע צו העלפן אויספלאנירן דעם עירוב מיט די שענסטע הידורים.

און צום לעצט איז צוגעקומען די הילף פון ר' משה סורקיס הי"ו, וועלעכע האט געשאפט און געווען עומד על גביו אינאיינעם מיט רבי יצחק גרין אויף דעם קאנטראקטער פון די עירוב, איבערגעבנדיג זיך די לעצטע פאר וואכן די גאנצע צייט צו ענדיגן דעם עירוב וואס גיכער.

נאך וואס די עירוב איז בס"ד פארטיג געווארן האט די רב הרב חיים שלמה בערגער שליט"א אבד"ק קהל חסידים ד'קאסא גראנדע אריזאנע, זיך פארבינדן מיט עטליכע רבנים וואס האבן עקספעריענס אין די תחום פון עירובין, צאמצושטעלן א ועד הרבנים צו שטיין אינאיינעם על המשמר אז די עירוב זאל זיין בתכלית הכשרות. און די וואך זענען טאקע צוויי גאר חשוב'ע רבנים געקומען צו פארן און געגעבן זייער השגחה אויפן עירוב, נאך עטליכע רבנים קומען בעזה"ש די קומענדיגע וואך.

אין די בילדער ווערן געזעהן 

הגאון רבי יעקב זיידא שליט"א דומ"ץ ויזניץ וויליאמסבורג אינאיינעם מיט הגאון רבי שמעון אברהם אינדיג שליט"א אבד"ק ריבאטיטש אין באגלייטונג פונעם מייסד היישוב הרב יהושע רובין און די חשוב'ע עסקנים רבי יצחק גרין און רבי משה סורקיס

ביים פארטיגן איבערקוקן דעם עירוב האט מען געזעהן א זעלטן גרויסע זאמד שטורעם אנקומען.

קבלת פנים פאר די רבני ועד העירוב, אין שטוב פונעם מייסד היישוב הרב יהושע רובין

מעמד זיכוי הפת פארן עירוב זכרון משה חיים ד'קאסא גראנדע אריזאנע איז פארגעקומען פרייטאג פרשת שופטים ה' אלול נאך חצות, אין שטוב פונעם מרא דאתרא דינוב'ע רבי שליט"א ווי דער מייסד היישוב הרב יהושע רובין האט איבערגעגעבן די פת פאר אביו דעם רבי'ן שליט"א וועלעכע האט געמאכט די ברכה אין איבערגעגעבן דעם פת פאר הרב רבי חיים שלמה בערגער שליט"א אבד"ק קהל חסידים ד'קאסא גראנדע אריזאנע.

צום מעמד האט דער מייסד היישוב געמאכט זיכער און גערופן אלע קרייזן פון שטאט צו קומען איינטיילנעמען אין די מעמד.

צום מעמד זענען זיך צאמגעקומען טייל פון די תושבי קאסא גראנדע וואס האבן געוואלט בייוואוינען אזא היסטאריע מעמד.