זעלענסקי מיט א שטרענגע ווארענונג צו אינטערנאציאנאלע עירליינס: "די רוסישע לופטן זענען מער נישט זיכער"

דער אוקראינישער פרעזידענט וולאדימיר זעלענסקי האט די וואך ארויסגעגעבן א שארפע און קלארע ווארענונג פאר אלע עירליינס וואס פליען נאך אלץ דורך די רוסישע לופטן, ווי אויך פאר די אינשורענס קאמפאניס וואס דעקן די פליגערס און יעדן איינעם וואס פארלאזט זיך אויף די גרויסע רוסישע עירפארטס. ער האט קלארגעשטעלט אז די לופטן העכער רוסלאנד זענען געווארן לעבנס-געפארליך.

זעלענסקי האט אונטערגעשטראכן אז אוקראינע האט בכלל נישט אין פלאן צו צילן ציווילע פאסאזשיר פליגערס, אבער די ריזיגע מאס דראונס וואס פליען יעצט ארום אין די רוסישע טעריטאריע איז געשטיגן צו א שטאפל וואס מען קען מער נישט איגנארירן. דאס איז נישט געווען קיין סטראשע קעגן ציווילע בירגער, נאר ענדערש אן ערנסטע ווארענונג איבער די אומזיכערע סביבה וואס רוסלאנד'ס אייגענע מלחמה האט אנגעמאכט העכער איר אייגענעם באדן.

"די מלחמה וואס רוסלאנד האט אנגעהויבן, פארמאכט יעצט אירע אייגענע לופטן," האט זעלענסקי געזאגט, אנווייזנדיג אז כאטש די רוסישע רעגירונג פראבירט צו באהאלטן דעם אמת און די סכנה, איז די רעאליטעט אז די רוסישע עירספעיס גייט פאקטיש ווערן פארמאכט. ער האט געווארנט אז פאר עירליינס וואס נוצן נאך אלץ מאסקווע, סעינט פיטערסבורג אדער אנדערע גרויסע רוסישע שטעט אלס א דורכגאנג, איז 'ביזנעס עז יוזשעל' מער נישט קיין אפציע.

צו ווייזן אז דאס איז נישט סתם פוסטע רעטאריק, האט זעלענסקי געמאלדן אז די אוקראינישע אויסערן מיניסטעריום וועט איבערגעבן פונקטליכע אינפארמאציע פאר אינטערנאציאנאלע ארגאניזאציעס איבער די סכנות. ער האט ספעציעל געפאדערט פון אמבאסאדארן אין קיעוו און מאסקווע צו איבערגעבן די ווארענונג פאר זייערע רעגירונגען, כדי די עירליינס זאלן נעמען די סכנה מיט אן ערנסטקייט.

דאס איז נישט די ערשטע מאל וואס אזעלכע קאנסערנס שווימען ארויף. די יוראפעישע יוניאן'ס אוויאציע אגענטור האט שוין פריער געווארנט קאמפאניס נישט צו פליען אין די מערב-רוסישע לופטן. דאס קומט נאך א טראגישע אינצידענט אין יאר 2024, ווען אן 'אזערביידזשאן עירליינס' פליגער איז אראפגעקראכט נאכדעם וואס עס איז געטראפן געווארן דורך די רוסישע לופט-פארטיידיגונג סיסטעם בעת זיי האבן געצילט אוקראינישע דראונס. יענע עקסידענט האט איבערגעלאזט 38 טויטע און האט ארויסגעברענגט ווי רעאל די סכנה איז.

די פרישע ווארענונג קומט אין א צייט וואס די געוואלדטאטן אויף ביידע זייטן פונעם גרעניץ ווערן נאר שטערקער. רוסלאנד האט אין די לעצטע וואכן פארשטארקט אירע באמבארדירונגען אויף קיעוו און אנדערע אוקראינישע שטעט. ביי איין לעצטיגע איבערנאכט אטאקע מיט מיסילס און דראונס זענען אומגעקומען א צענדליג מענטשן און פילע אנדערע זענען פארוואונדעט געווארן.

זעלענסקי האט ארויסגעברענגט אז די אומזיכערע רוסישע לופטן זענען א דירעקטע רעזולטאט פון די רוסישע אטאקעס. "ציווילע אוויאציע האט נישט קיין פלאץ צווישן דראונס," האט ער אויסגעפירט, איבערלאזנדיג א קלארע מעסעדזש פאר די אינטערנאציאנאלע געמיינדע איבער די ערנסטקייט פון די סיטואציע.