ארום 3,000 אידן האבן זיך באטייליגט אין די תפילות און יום טוב'דיגע פראגראמען דעם פארגאנגענעם ראש השנה איבער קפריסין (סייפרוס), ווען די לאקאלע חב"ד צענטערן איבער'ן אינזל האבן אויפגענומען טויזנטער לאקאלע איינוואוינער און באזוכער צו פראווען דעם יום טוב אינאיינעם.

די יום טוב'דיגע מנינים און סעודות זענען פארגעקומען אין זיבן פאַרשידענע חב"ד צענטערן איבער קפריסין, ווען די הויפט צענטראלע פארזאמלונג איז אפגעראכטן געווארן אין די שטאט לארנאקא, וואס האט צוגעצויגן הונדערטער באטייליגטע.

צווישן די פראמינענטע געסט ביים לארנאקא צוזאמקום איז געווען דער ניי-באשטימטער אמעריקאנער אמבאסאדאר צו קפריסין, דזשאן ברעסלאו, וועלכער האט זיך אנגעשלאסן אינעם מעמד אינאיינעם מיט זיין פרוי סאניא.

דער אמבאסאדאר און זיין פרוי זענען ווארעם אויפגענומען געווארן דורך הרב אריה זאב ראסקין, דער הויפט רב פון קפריסין און ארטיגער חב"ד שליח, אינאיינעם מיט די רעבעצין שיינדל ראסקין. דורכאויס די פארזאמלונג האט הרב ראסקין אויפגעטרויטן מיט א רעדע איבער די גרויסקייט און חשיבות פון ראש השנה, ווי אויך איבער די וויכטיגקייט פון פריינטשאפט און ארויסווייזן רעספעקט איינער צום צווייטן.

ברעסלאו'ס באטייליגונג קומט בלויז עטליכע טעג נאכדעם וואס ער האט אפיציעל איבערגענומען זיין דיפלאמאטישן פאסטן אין קפריסין, נאכדעם וואס ער האט איבערגעגעבן זיינע אפיציעלע פאפירן פאר'ן פרעזידענט פון קפריסין, ניקאס כריסטאדולידעס, דעם 9'טן סעפטעמבער.

אויסער די הויפט מנינים אין לארנאקא, האבן די אנדערע חב"ד צענטערן ארום דעם אינזל אויך ארגאניזירט שיינע ראש השנה תפילות און פראגראמען, אריינגערעכנט מנינים צו הערן תקיעת שופר און ספעציעלע אקטיוויטעטן פאר די קינדער. די ברייטע יום טוב פראגראמען זענען געקומען נאך א רייע הכנות דורכאויס חודש אלול, וואס האט אריינגערעכנט שיעורים און ספעציעלע פראגראמען פאר קינדער און יוגנטליכע.

די מאסיווע באטייליגונג שפיגלט אפ די בליענדיגע און וואקסנדיגע אידישע אינפראסטרוקטור אויפ'ן אינזל, וואס באדינט סיי די שטענדיגע איינוואוינער און סיי די פילע אידישע טוריסטן און באזוכער וואס קומען אפרוען אין קפריסין.