שמחת יום טוב אין שפיטאל: א געהויבענע שמחת בית השואבה פאר קינדער חולי ישראל אין 'שיבא' מעדיקעל צענטער

קינדער וועלכע גייען אדורך שווערע קענסער באהאנדלונגען, אינאיינעם מיט זייערע פאמיליעס, האבן מיטגעהאלטן א ספעציעלע און פרייליכע שמחת בית השואבה אין די 'שיבא' מעדיקעל צענטער דורכאויס חול המועד סוכות, ארגאניזירט דורך די באקאנטע 'רחשי לב' ארגאניזאציע.

די באקאנטע חסידישע זינגערס שמוליק סוכות און משה דוד ווייסמאנדל זענען ספעציעל געקומען אין שפיטאל אריין צו ברענגען שמחת יום טוב פאר די קראנקע קינדערלעך. זיי האבן אינאיינעם מיט די קינדער און זייערע עלטערן געזינגען און געטאנצן מיט גרויס שמחה. די שיינע מסיבה האט אויך אריינגערעכנט לעבעדיגע מוזיק און א רייכע כיבוד פאר די פאמיליעס וואס זענען ליידער געצווונגען צו פארברענגען דעם יום טוב צווישן די שפיטאל ווענט אינמיטן שווערע טריטמענטס.

די געהויבענע אונטערנעמונג איז א טייל פון די כסדר'דיגע הייליגע ארבעט פון 'רחשי לב', וועלכע שטיצט און באגלייט קינדער וואס קעמפן מיט די ביטערע מחלה ל"ע, אינאיינעם מיט זייערע פאמיליעס. די ארגאניזאציע שטייט זיי צו הילף דורכאויס די מעדיצינישע באהאנדלונגען און טוט אלעס אין דער וועלט אריינצוברענגען א שמייכל און מאמענטן פון פרייד אין די שווערע צייטן.

בילדער פון די שמחת בית השואבה צייגן ווי די קינדער טאנצן מיט התלהבות אינאיינעם מיט די זינגערס און די איבערגעגעבענע וואלאנטירן, וואס האבן באוויזן אריינצוברענגען די עכטע סוכות אטמאספערע און אמת'ע שמחת יום טוב דירעקט אריין אין שפיטאל.