בס"ד

ערנסטע אומרוען און צענדליגע ארעסטן אין ירושלים נאך א גרויסע שמחת בית השואבה אינמיטן די נאכט

ערנסטע אומרוען האבן אויסגעבראכן אין ירושלים דורכאויס די פארגאנגענע נאכט, נעבן א גרויסע שמחת בית השואבה און הילולא פון רבי נחמן מברסלב זי"ע וואס איז פארגעקומען אין די 'חוט של חסד' מוסדות אויף שמואל הנביא סטריט.

די כאאס האט זיך אנגעהויבן ארום 3:00 פארטאגס נעבן חיים בר-לב בולעווארד און זאקס סטריט, ווען גרויסע מאסן האבן זיך פארזאמלט אינעם געגנט ארום די גרויסע צאמקום. לויט די פאליציי, האבן צענדליגע מענטשן בלאקירט די רעלסן פון די 'לייט רעיל' באן און אפגעשטעלט דעם טראפיק אינעם געגנט, אינדערצייט וואס שטיינער און אנדערע חפצים זענען געווארפן געווארן אין ריכטונג פון די פאליציי אפיצירן.

די פאליציי האט געהייסן דעם עולם זיך צוגיין, און נאכדעם וואס מ'האט נישט געפאלגט, האבן זיי אריינגעברענגט א וואסער קאנאן (מכת"זית) און גענוצט סטאן-גרענאדן, בשעת אפיצירן און מג"ב פאליציי האבן געארבעט אויסצורוימען דעם געגנט.

אנהייב זענען 5 פארדעכטיגטע ארעסטירט געווארן, אבער אין א שפעטערדיגע אפדעיט האט די פאליציי איבערגעגעבן אז די צאל ארעסטירטע איז געשטיגן צו 11, נאכדעם וואס די אומרוען האבן זיך פארשפרייט צו נאך געגנטער אין ירושלים.

א מג"ב אפיציר איז לייכט פארוואונדעט געווארן נאכן ווערן געטראפן אין קאפ פון א פלאש. ווי אויך זענען עטליכע שטאטישע קארס און טראקס געשעדיגט געווארן דורכאויס די אינצידענטן, און איין שטאטישע קאר איז אפילו פארכאפט געווארן דורך די ראיאטירער און שפעטער איבערגעלאזט געווארן.

די אומרוען זענען פארגעקומען אינדערצייט וואס ריזיגע מאסן אידן האבן זיך באטייליגט אינעם יערליכן חול המועד פארזאמלונג אין 'חוט של חסד', וואס האט אריינגערעכנט א געהויבענע שמחת בית השואבה און די הילולא פון הרה"ק רבי נחמן מברסלב זי"ע.