בארא פארק. — נאך לאנגע יארן פון פלאנירונגען און בוי-ארבעט, הייבט זיך ענדליך אן דער פאקטישער אריינמוף אינעם נייעם חסידישן ישוב 'לעיקפראנט' אין פלארידע. אין ליכט פון דעם איז די וואך פארגעקומען א שיינע מסיבת פרידה אין בארא פארק פאר איינע פון די ערשטע תושבים וואס ציען זיך אריבער אהין.

די מסיבת פרידה איז פארגעקומען דינסטאג אויפדערנאכט, וואו גוטע פריינט און באקאנטע האבן זיך צוזאמגעזעצט ארום די טישן זיך צו געזעגענען פונעם תושב, וועלכער פארלאזט בארא פארק און גרייט זיך זיך צו באזעצן אינעם נייעם לעיקפראנט קאמיוניטי.

דער צוזאמקום קומט אין א צייט וואס דער נייער חסידישער ישוב נעבן אקיטשאבי (Okeechobee) גייט אריין אין איר קומענדיגע פאזע, און גרייט זיך אויפצונעמען די ערשטע משפחות נאך יארן פון שווערע הארעוואניע און קאנסטראקשן.

דער לעיקפראנט דעוועלאפמענט ווערט געבויט מיט אלע צוגעהערן און אינפראסטרוקטור וואס פעלט זיך אויס פאר היימישע חסידישע משפחות, אריינגערעכנט שולן, מוסדות, א מקוה און אנדערע קהילה געברויכן. לויט אפיציעלע רעקארדס אין פלארידע, זענען שוין עטליכע פון די מוסדות און קהילה אינסטיטוציעס לעגאל און אפיציעל געגרינדעט געווארן.

ווי באריכטעט דא אויף 'א בליק', וועלכע האלט א נאנטע אויג אויף די אנטוויקלונגען פונעם נייעם ישוב, האלט מען שוין יעצט ביי די לעצטע פינישינג ארבעט אויף די הייזער בעפאר די ערשטע משפחות קומען אן.

פאר די וואס פארלאזן די אלטע היימישע געגנטער אין ניו יארק, איז דאס פיל מער ווי בלויז א טויש פון אן אדרעס — עס באצייכנט דעם אנהייב פון א נייעם טאג-טעגליכן לעבן אין א פרישן חסידישן ישוב וואס איז אויפגעבויט געווארן פונעם סאמען יסוד.