שטורעם אין פיטסבורג אוניווערסיטעט: טעסק פארס ארויסגעגעבן באריכט איבער אנטיסעמיטיזם אן זיך דורכרעדן מיט די אידישע סטודענטן

די אוניווערסיטעט פון פיטסבורג שטייט אויס שארפע קריטיק פון די לאקאלע אידישע קאמיוניטי, נאכדעם וואס א ספעציעלע 'טעסק פארס' האט פארברענגט ארום אנדערהאלבן יאר צוזאמצושטעלן רעקאמענדאציעס וויאזוי צו באקעמפן אנטיסעמיטיזם אויפן קעמפוס, אבער אן זיך דורכרעדן מיט די אידישע סטודענטן זעלבסט.

דער 8-זייטיגער באריכט, וואס איז ארויסגעשטעלט געווארן דורכאויס דעם זומער, האט ארויסגערופן פרישע אויפברויז איבער וויאזוי די רעקאמענדאציעס זענען געמאכט געווארן, און צי די סטודענטן וואס ווערן די מערסטע אפעקטירט פון אנטיסעמיטיזם האבן בכלל געהאט א געלעגנהייט צו לאזן הערן זייער שטימע.

די אוניווערסיטעט פארמאגט א געשאצטע 1,400 אידישע סטודענטן. קריטיקירער פרעגן פארוואס די קאמיטעט האט נישט דורכגעפירט א ברייטערע אנקעטע אדער געהאלטן מיטינגען צו הערן זייערע זארגן בעפארן ארויסגעבן די רעקאמענדאציעס.

כאטש ס'איז יא געווען איין סטודענט פארטרעטער פון די 'הלל' ארגאניזאציע אין די קאמיטעט, טענה'ן די קריטיקירער אז איין פארטרעטער איז נישט קיין פאַרטרעטער פארן הערן דירעקט פון א ברייטערע צאל אידישע סטודענטן וואס שפירן דעם אנטיסעמיטיזם אויף זייער אייגענע הויט.

דער באריכט האט אויך ארויסגערופן קעגנערשאפט פון אנדערע פראפעסארן און קאמיוניטי מיטגלידער וואס זארגן זיך איבער די רעקאמענדאציעס און די מעגליכע ווירקונג אויף 'פרי ספיטש' און אקאדעמישע פרייהייט.

דער פאָרזיצער פון די טעסק פארס האט זיך פארענטפערט און פארטיידיגט דעם פראצעס, זאגנדיג אז מ'האט זיי קיינמאל נישט געהייסן צוזאמנעמען דאטא, און אז די רעקאמענדאציעס זענען ארויסגעקומען פון אינערליכע שמועסן צווישן די קאמיטעט מיטגלידער וואס זענען געווען געבונדן צו 'קאנפידענשעל אגרימענטס'.

די אוניווערסיטעט זאגט פון איר זייט אז זי ארבעט ווייטער צו באהאנדלען אנטיסעמיטיזם און פארבעסערן דעם אטמאספער אויפן קעמפוס. אבער די גאנצע פרשה האט אויפגעברענגט א ברייטערע פראגע ביי אידישע עסקנים און סטודענטן: צי קען מען בכלל מאכן עפעקטיווע פלענער צו באשיצן אידישע סטודענטן, אן ארייננעמען אין בילד די זעלבע מענטשן וואס די פלענער זענען געצילט צו באשיצן?