התרחבות גבולי הקדושה אין מאנסי: אלטער חסידישער בית מדרש ווערט אראפגעווארפן צו מאכן פלאץ פאר א נייעם ריזיגן צענטער

אן אלטגעזעסענער חסידישער בית מדרש אין מאנסי ווערט די טעג אראפגעווארפן ביסודו, אלס טייל פון די צוגרייטונגען צו בויען א פרישן, פיל גרעסערן בנין וואס זאל קענען אקאמאדירן די כסדר-וואקסנדע צאל מתפללים בליעה"ר.

ווי מען קען זען אויף ווידעא קליפס פונעם ארט, זענען שווערע טראקטורן און מאשינערי שוין אויפ'ן פלאץ און רייסן איין דעם עקזיסטירנדן געביידע, וואס צייכנט אפ דעם ערשטן פאקטישן פאזע פונעם גרויסן בוי-פראדזשעקט. לויט אינפארמאציע וואס איז מיטגעקומען מיט די בילדער, איז דער באשלוס צו איבערבויען דעם ביהמ"ד געקומען נאכדעם וואס דער פראבלעם פון 'צר המקום' איז געווארן גאר שטארק, און דער ביז-יעצטיגער בנין איז פשוט מער נישט געווען גענוג גרויס אריינצונעמען דעם גרויסן ציבור מתפללים מיט א רואיגקייט.

דער נייער פראדזשעקט קומט אין א צייט וואס די היימישע און חסידישע קהילות אין מאנסי האלטן אין איין וואקסן און זיך פארברייטערן. דאס האט געפירט דערצו אז צענדליגע לאקאלע מוסדות און קהילות האבן זיך גענומען בויען און פארגרעסערן זייערע צענטערן אין די לעצטע פאר יאר.

עטליכע גרויסע קהילות אין מאנסי האבן לעצטנס אונטערגענומען מעכטיגע בוי-פראדזשעקטן. אזוי צום ביישפיל האבן חסידי ברסלב אין מאנסי אראפגעווארפן זייער אלטן ביהמ"ד נאכדעם וואס עס איז געווארן צו קליין פאר די הונדערטער מתפללים, און האבן נאכפאלגנד אפגעראכטן א גרויסארטיגע מעמד הנחת אבן הפינה פאר א נייעם ריזיגן קאמפלעקס. ענליך צו דעם, האט קהילת בעלזא אין מאנסי געמאלדן אנהייב יאר איבער א מעכטיגן 20 מיליאן דאלארדיגן פראדזשעקט צו בויען א נייעם בנין המוסדות.

דער ניי-געפלאנטער ביהמ"ד פונעם יעצטיגן פראדזשעקט וועט בעז"ה צושטעלן דעם נויטיגן פלאץ און הרחבת הדעת פאר די קהילה, און וועט ערמעגליכן דעם ווייטערדיגן וואוקס פונעם ציבור.