דראמאטישע רעטונג: צוויי פישער ראטעווען ארויס א מאן וואס האט איבערגעלעבט 9 שעה אין וואסער 20 מייל פונעם קאליפארניע בארטן

צוויי פישער פון ניופארט ביטש, קאליפארניע, האבן אפגעראטעוועט א 37-יעריגער ארבעטער פון א 'רויעל קאריביען' קרוז שיף, נאכדעם וואס זיי האבן אים געטראפן שווימען אין וואסער קנאפע 20 מייל אוועק פונעם סאדערן קאליפארניע בארטן.

די צוויי, שאן נארטאן און גרענט גארעט, זענען געווען אויפ'ן וועג צוריק פון א פיש-כאפן טריפ נעבן קאטאלינע איילענד דעם פרייטאג, נאוועמבער 6, ווען זייער קעפטן פונעם שיפל האט באמערקט ווי א מענטש ראנגלט זיך פאר זיין לעבן אינעם פאציפישן אקעאן. די פישער האבן באלד אפגעשטעלט זייער שיפל, אריינגעצויגן די פיש-כאפן שטריק, און מיט געמיינזאמע כוחות ארויפגעצויגן דעם מאן אויפ'ן שיף.

נאכ'ן זיך ערהוילן פונעם ערשטן שאק, האט דער געראטעוועטער זיי דערציילט אז ער איז א פיאניסט וואס ארבעט אויף די רויעל קאריביען'ס Ovation of the Seas קרוז שיף. נארטאן דערציילט אז די ערשטע ווערטער פונעם מאן זענען געווען: "א דאנק אייך. איך האב געמיינט אז איך גיי שטארבן." די אויטאריטעטן גלייבן אז ער איז אראפגעפאלן פונעם שיף ארום 2:30 פארטאגס, וואס מיינט אז ער האט פארבראכט ארום ניין שעה אינעם וואסער בעפאר מען האט אים געטראפן.

ניופארט ביטש לייפגארדס זענען ארויסגעקומען צום סצענע נאכדעם וואס די פישער האבן אריינגעגעבן אן עמערדזשענסי רוף, און זיי האבן געהאלפן אפפירן דעם איבערלעבער צו באקומען מעדיצינישע באהאנדלונג. די יו. עס. קאוסט גארד האט באשטעטיגט אז דער מאן איז אריינגעפירט געווארן אין שפיטאל און מען ערווארט אז ער וועט איבערלעבן, אינדערצייט וואס אינוועסטיגעיטארס ארבעטן צו דערגיין ווי אזוי ער איז אנגעקומען אין אקעאן.

זיין אידענטיטעט איז דערווייל נישט פובליצירט געווארן, און די רויעל קאריביען פירמע האט געמאלדן אז זיי שטעלן צו הילף און שטיצע פארן ארבעטער, אבער האבן זיך אנטזאגט פון ארויסגעבן מער דעטאלן צוליב רעספעקט פאר זיין פריוואטקייט.

נארטאן האט אנגעוויזן אז די אומגעווענליך ווארימע פאציפישע וואסערן, וואס זענען געווען ארום 76 דעגרי פארענהייט, האבן ווארשיינליך געהאלפן דעם מאן איבערלעבן די לאנגע שעות אין וואסער. די רעטונג איז פארגעקומען טיף אין אקעאן, ווען לייפגארד באאמטע שאצן די ווייטקייט אויף ארום 15 ביז 20 מייל פונעם בארטן. וואס פונקטליך עס האט געפירט דערצו אז דער ארבעטער זאל אראפפאלן פונעם שיף - און ווי אזוי ער האט באוויזן זיך צו האלטן איבער'ן וואסער פאר אזוי לאנג - איז דערווייל נאכנישט קלאר.