וויצע פרעזידענט דזשעי. די. ווענס אונטער שארפע קריטיק נאך קאנטראווערסיאלע קאמענטארן איבער אנטיסעמיטיזם ביי א פארמאכטע צוזאמקום

וויצע פרעזידענט דזשעי. די. ווענס געפינט זיך אונטער א פרישע כוואליע פון קריטיק דורך אידישע קאמענטאטארן, נאך קאמענטארן וואס ער האט געמאכט איבער די נאטור פון אנטיסעמיטיזם ביי א פארמאכטע אויפטריט פאר די 'רעפובליקאנער אידישע קאאליציע' (RJC) אין לאס וועגאס די וואך.

רעדנדיג צום RJC פארזיצער נארם קאולמאן ביים 'נעשאנאל לידערשיפ סאמיט' פון די גרופע, האט ווענס אראפגעלייגט דעם באגריף פון אן "עלילת דם" אלס די הויפט יסוד פון אנטיסעמיטיזם. ער האט עס אבער ברייטערהייט דעפינירט אלס א געדאנק אז א מענטש איז שולדיג אין א פארברעכן "צוליב דיינע גענעטיקס... דיין בלוט... דיין אפשטאם," אנשטאט עפעס וואס זיי האבן פאקטיש געטוהן.

ער האט דאס פארבינדן מיט קריסטליכע טעאלאגיע, נוצנדיג דעם באגריף אז מענטשן זענען באשאפן געווארן בצלם אלקים - עפעס וואס ער זאגט אז אידן און קריסטן טיילן אינאיינעם, און האט ארגומענטירט אז די געמיינזאמע גלויבן מאכט די קריסטליכע רעליגיע אלס "די לעזונג" צו אנטיסעמיטיזם. ווי אויך האט ער פארבינדן דעם שפרונג פון אנטיסעמיטיזם אין אמעריקע צו די אימיגראציע פאליסיס, זאגנדיג אז עס וואקסט ווען דאס לאנד נעמט אריין גרופעס וואס ברענגען מיט זיך פרעמדע עטנישע רייבערייען און פיינטשאפט.

די רעדע, וואס איז געזאגט געווארן אונטער פארמאכטע טירן אבער איז שפעטער ארויסגערינען און פובליצירט געווארן אין פולן דורך די 'דעילי ווייער', ווערט יעצט שארף קריטיקירט. קריטיקירער ווייזן אן אז אן "עלילת דם" האט א ספעציפישע, היסטארישע באדייט: די מיטל-אלטער אנטיסעמיטישע באשולדיגונג אז אידן האבן רח"ל געמארדעט קריסטליכע קינדער צו נוצן זייער בלוט פאר רעליגיעזע ריטואלן - א בלוט-בילבול וואס האט געפירט צו ברוטאלע פאגראמען איבער אייראפע פאר הונדערטער יארן, אנגעהויבן פונעם באקאנטן בלוט-בילבול אין נארוויטש אין יאר 1144 און ווייטער.

די קריטיקירער טענה'ן אז דאס וואס ווענס האט אראפגעשפילט דעם טערמין צו מיינען בלויז "שולד לויט אפשטאם" אין אלגעמיין, צייגט אז ער פארשטייט נישט אדער איגנארירט דעם ספעציפישן היסטארישן באדייט. זיי ווייזן אויך אן אז ווענס האט שוין אין די פארגאנגענהייט גענוצט דעם ווארט "עלילת דם" זייער לייכטזוניג, אריינגערעכנט ווען ער האט באשריבן די קריטיק קעגן די 'אייס' (ICE) אגענטור, וואס האט שוין דעמאלטס געצויגן ענליכע קריטיק פון אידישע קאמענטאטארן.