בס"ד

פאלסבורג, ניו יארק – שוין לאנגע יארן וואס די איינוואוינער פון פאלסבורג זענען באזארגט איבער די זיכערהייט ביי דעם "לארעל עוועניו" אינטערסעקשאן, אלס אנטווארט איז אפגעהאלטן געווארן א ספעציעלע זיצונג אראנדשירט דורך דעם טאון סופערווייזער מר. מייקל בענסימאן וואו עס האבן זיך באטייליגט רעפרעזענטאטן פון דער "מאונטן וואוד עסטעיטס", "גראוו עסטעיטס" באנגעלאו קאלעניעס, און ווי אויך פארשטייער פון אידישע קאמיוניטי קאנסיל פון סאליווען קאונטי (JCC), דער פאלסבורג פאליציי דעפארטמענט און פאלסבורג פייער דעפארטמענט מיט'ן ציל די דוסקוסירן די טראפיק זיכערהייט פראבלעמען ביים אינטערסעקשאן פון לארעל עוועניו, לארעל פארק ראוד און מאונטען וואוד סירקל.

א לעצטיגער טראפיק־שטודיע האט קלאר געצייגט אז דער יעצטיגער "Y" אינטערסעקשאן שאפט אומזיכערע אומשטענדן, צוליב קארס וואס קומען צו פארן מיט א שנעלקייט און דרייווערס וואס ווערן צומישט אין וועלכן ריכטונג צו פארן.

פארגעלייגטע לעזונגען

ביים זיצונג זענען פארגעשטעלט געווארן צוויי הויפט לעזונגען: איבערצומאכן דעם Y אינטרסעקשאן צו א מער פארזיכערטער “T” אינטערסעקשאן, אדער עס איבערצובויען צו א "ראָנדאַבאָוט" וואס וועט מער פארגרינגערן די טראפיק פלוס. דער פייער דעפארטמענט האט אבער אויסגעדרוקט זארגן וואס עס וועט פאסירן ווען די גרעסערע פייער טראקס וועלן האבן שוועריקייטן דורכצופארן אויף אזא אופן, און דער איינציגסטער וועג וויאזוי די גרעסערע טראקס וועלן קענען דורכפארן איז אויב דער שטאטראט וועט אויסקויפן די פראפערטי עקן פון די באדן אייגנטומער כדי צו קענען פארברייטערן דעם אינטערסעקשאן אז די טראקס זאלן קענען דורכפארן זיכערהייט

קומענדיגע שריט

סופערווייזער בענסימאן האט געמאלדן געווען אז די טעמע איז שוין איבערגעגעבן געווארן צו שטאט אינדשענירן וועלכע וועלן דורכגיין סיי די קורץ־טערמין זיכערהייט־לעזונגען און סיי די פלענער פון דעם לאנגן טערמין. א קביעות'דיגע לעזונג קען אימפלעמנטירט ווערן שוין אין די קומענדיגע יאר. אין צוגאב האט די פאלסבורג שטאטראט שוין איינגעגעבן א פארלאנג פאר פאנדן צו קענען צובויען סיידוואקס לענגאויס דעם לארעל עוועניו, פאר די זיכערהייט פון די פוסגייער.

שטיצע פון דער קאמיוניטי

דער JCC פון סאליוואן קאונטי, צוזאמען מיט קאמיוניטי פירער, האבן זיך פארפליכטעט ווייטער צו אדוואקירן ביי די שטאטישע באאמטע כדי צו באקומען די נויטיגע שטיצע און געלט פאנדן פאר דעם פראיעקט. די זיצונג איז צושטאנד געקומען בלויז אדאנק די דרוק און אקטיווע ארבעט פונעם JCC וועלכע האבן שוין לאנג געבעטן אז די שטאט זאל דורכפירן דעם טראפיק שטודיע וועלכע וועט למעשה רעזולטאטירן אז די שאסייען זאלן זיין פיל מער פארזיכערט.

שטאטישע איינוואוינער האבן אויסגעדרוקט זייער דאנקבארקייט צו ר' אברהם ראזענבערג פון די  JCC פאר זיינע פילע לייסטונגען פאר די שטאט, און בפרט פאר זיינע באמיאונגען צו ברענגען דעם ברענעדיגן טעמע צו די אויפמארקזאמקייט און באהאנדלונג דורך די שטאטישע באאמטע.

זיכערהייט גאראנטי

"דער טעמע איז זייער וויכטיג פאר די זיכערהייט פון דרייווערס, פוסגייער און עמערדזשענסי אויטאמאבילן ביינאזאם,” האט זיך אויסגעדרוקט סופערווייזער בענסימאן. "מיט די צוזאמארבעט פון די קאמיוניטי פירער און שטאטישע באאמטע קענען מיר ארבעטן אויף די ריכטיגע לעזונגען וועלכע וועלן באשיצן אונזערע איינוואוינער פאר לאנגע יארן.”

"איך בין שטאלץ מיט די ארבעט וואס מיר טוהן אויף א כסדר'דיגן אופן פאר די זיכערהייט און באקוועמליכקייט פון אלע איינוואוינער פון סאליווען קאונטי, דאס איז בלויז איין ביישפיל", האט זיך אויסגעדרוקט ר' ירמי' ברוין, טשעירמאן פון דער אידישע קאמיוניטי קאונסיל אוו סאליווען קאונטיע.