ישיבה בחור ארעסטירט בלויז 10 טעג פאר זיין חתונה, פאראורטיילט צו 20 טעג אין מיליטערישע טורמע
גאלערי
אומדערהערט: ישיבה בחור ארעסטירט דורך די מיליטערישע פאליציי אין ארץ ישראל בלויז צען טעג בעפאר זיין חתונה
א ישיבה בחור פון די שטאט ראשון לציון איז ארעסטירט געווארן דורך די מיליטערישע פאליציי בלויז צען טעג בעפאר זיין באשטימטע חתונה, און איז פאראורטיילט געווארן צו אפזיצן 20 טעג אין א מיליטערישע תפיסה.
לויט די באריכטן, איז דער חתן ארעסטירט געווארן אינמיטן די נאכט ביי זיך אינדערהיים, דורכאויס א ברייטע אפעראציע דורך די מיליטערישע פאליציי צו כאפן אזעלכע וואס ווערן קלאסיפיצירט אלס 'עריקים' (מיליטער אנטלאפענע).
דער ברוטאלער ארעסט האט ארויסגערופן גרויס זארג און שאק, וויבאלד דער אורטייל פון צוואנציג טעג תפיסה ענדיגט זיך ערשט נאך זיין געפלאנטע חתונה דאטום, וואס דאס סטראשעט צו שטערן די קומענדיגע שמחה און לאזט איבער די משפחה אין א שרעקליכע קלעם.
די באקאנטע ארגאניזאציע 'נותנים גב', וועלכע גיט זיך אפ מיט צו העלפן און באגלייטן ישיבה בחורים וואס פלאגן זיך מיט ארעסטן איבערן מיליטער-געזעץ, האט שוין איבערגענומען דעם קעיס און ארבעט פיבערהאפט צו טרעפן א לעזונג ארויסצוזען דעם חתן פון תפיסה באצייטנס.