פארגאנגענעם דאנערשטאג פר' ויגש, איז פארגעקומען א גאר שטורמישער וויכטיגער אסיפת הרבנים פאררופן דורך די התאחדות הרבנים, ווי עס האבן איבערגעפילט די גרויסע קאנטינענטאל זאלן אין וויליאמסבורג, הונדערטער רבנים ואדמורי"ם, מנהיגי הקהלות, רבנים היושבים על מדין, מורי הוראות און מוצי"ם פון צענדליגער קהלות בישראל איבער ניו יארק און ניו דזשערסי, וועלכע זענען געזיצן קרוב צו 3 שעה און דן געווען בכובד ראש איבער גאר וויכטיגע נושאים וועלכע שטייען אויפן טיש, ביים ערליכן אידנטום אין אמעריקא.

דער הויפט ציל פון די אסיפה איז געווען איבער א גאר ברענענדיגע נושא הנוגע לקדושת ישראל, איבער די מדריכי חתנים וכלות פאר די חתונה, און די אלע שיעורים און דרשות און שלום בית קורסעס אויף נאך די חתונה, און די טערעפיסטן וועלכע באהאנדלן ענינים שבין איש לאשתו. ענינים וועלכע זענען נוגע צום סאמע וויכטיגסטן פונקט אינעם עתיד פון קדושת ישראל, און עס ווערט ליידער געפירט אין פילע פעלער אן א דעת תורה, און גאר פארקערט פון דעת תורה, און מסורת קדושת ישראל.

ווי אויך האט מען דן געווען אויף אנדערע ענינים וועלכע זענען עומד על הפרק, די פאלשע פדיון הבן מטבעות, פסול'ע מזוזות, עטליכע נושאים בעניני טעכנעלאגיע וועלכע זענען עומד על הפרק, איבערן חומש פשוטו של מקרא, און איבער עניני צניעות.

צו די באשטימטע צייט דאנערשטאג נאכמיטאג אום 2:30, האבן די קאנטינענטאל זאלן אנגעהויבן אנגעפילט צו ווערן מיט די רבנים המשתתפים, ווען צו יעדע וויילע קומען אריין נאך גדולי הרבנים ומנהיגי הקהלות פון איבער גרעיטער ניו יארק, וועלכע האבן אראפגענומען פון זייערע טייערע צייט זיך משתתף צו זיין אין די אסיפה לשם שמים. עס האט זיך ארויסגעשריגן פון זיך אליינס, שאו סביב עיניך וראו כולם נקבצו באו לך, ווי פון אלע שטעט איבער ניו יארק און ניו דזשערסי, קומען זיך צוזאם אלע היימישע רבנים, בדעה ובעצה אחת, לגדור גדר ולעמוד בפרץ, לשמור על גחלת ישראל שלא תכבה, ממשיך צו זיין דאס אידישקייט אומבארירט כפי המסורה לנו מרבותינו הקדושים זי"ע.

הגה"צ אבד"ק פריימאן וראב"ד התאחדות הרבנים שליט"א

געעפענט די אסיפה האט דער יו"ר הרב ר' נחמן זיגעלמאן שליט"א מנהל בית רחל ויואל משה אין קרית יואל, וועלכער האט איינגעלייטעט די אסיפה און געשטעלט דעם גאר ערנסטן טאן אויף וואס די היינטיגע אסיפה איז באזירט, ארויסברענגנדיג די וויכטיגקייט און די גרויסע אחריות דערפון מיד ולדורות. אויסרעכענדיג אין קורצן די ענינים וואס מען גייט דא היינט דן זיין בכובד ראש. דאן האט גענומען דאס ווארט הגה"צ אבד"ק פריימאן וראב"ד התאחדות הרבנים שליט"א, וועלכע איז אין קורצן איבערגעגאנגן די מטרה פונעם התייסדות התאחדות הרבנים דורך מרן גאון עוזינו רביה"ק מסאטמאר זי"ע, עס זאל זיין איין רבנ'ישע קערפערשאפט אויף אלע עניני חיזוק הדת, פאר אלע היימישע קהלות יוצאי אונגארן וגאליציע, און איז איבערגעגאנגן די היסטארישע אסיפות התאחדות הרבנים וועלכע זענען אלס פארגעקומען דורך די התאחדות הרבנים במשך די יארן.

דאן איז ער אריבער נושא ונותן צו זיין בהלכה אינעם ענין פון די פאלשע פדיון הבן מטבעות, וועלכע מען האט לעצטענס געטראפן, אז עס ווערט פארקויפט אפילו אין היימישע געשעפטן פאלשע מטבעות וועלכע ווערן געניצט פאר פדיון הבן, און עס איז באמת נישט ווערט קיין חמשה סלעים. אויף להבא האט מען גע'פסק'נט אז היות עס ווערט יעצט צוגעשטעלט אן אופן וויאזוי בודק צו זיין די מטבעות אויב עס איז אויטענטישע אדער פאלשע, ליגט א חיוב אויף יעדן טאטן אדער כהן בודק צו זיין פארן פדיון, זיכער צו מאכן אז עס איז נישט קיין פאלשע מטבעות. אויף לשעבר האט מען דן געווען כדרכה של תורה די צדדים לכאן ולכאן, און אויסגעפירט אז ווער עס האט נאך די מטבעות אוועקגעלייגט איז זיכער מחויב צו גיין בודק זיין, און אויב שטעלט זיך עס ארויס אלס פאלש, זאל מען איבערמאכן דעם פדיון. און הגה"צ מסערדעהאלי ודומ"ץ נייטרא שליט"א האט אנגעמערקט, אז לויט ווי עס שטעלט זיך ארויס פון די בדיקות, גייט דאס צוריק שוין מיט זעקס יאר, וואס עס דרייט זיך אויף די מארקעט די פאלשע מטבעות.

דאן האט דער ראב"ד מעורר געווען אויף נאך פארשידענע פירצות, ווי דאס איינקויפן סעלפאונס אין די געשעפטן וועלכע זענען נאך נישט געפילטערט, און עס נעמט צייט ביז מען טראגט עס פילטערן, און אינדערצווישן געשעהן גרויסע חורבנות. און מען דארף מטכס עצה זיין, מען זאל נאר פארקויפן געפליטערטע סעלפאונס. דאן איז דער ראב"ד אריבער מעורר צו זיין אויף דעם חומש פשוטו של מקרא, קעגן וועלכע פילע רבנים האבן שוין מעורר געווען לעצטענס. 

הרב ר' ליפא קליין שליט"א מנהל מערכת הכשרות

דאן האט גענומען דאס ווארט הרב ר' ליפא קליין שליט"א מנהל מערכת הכשרות, איבערן ענין פון די פאלשע פדיון הבן מטבעות. ער האט אויפגעוויקעלט וויאזוי די שאלה איז צושטאנד געקומען, דורך א היימישע ספרים געשעפט אין וויליאמסבורג, וועלכע האט בודק געווען פדיון הבן מטבעות וואס ער פארקויפט און זיך איבערצייגט אז עס איז פאלש. מען האט דאן פאררופן אן אסיפה אינעם בי"ד פון די התאחדות הרבנים, און עס איז דאן ארויסגעקומען א קול קורא איבער דעם. ער איז אריין אין די מציאות הענינים וויפיל זילבער עס ליגט אין די מטבעות, און אז עס איז קלאר אז די פאלשע האבן נישט דעם שיעור זילבער, און געוויסע האבן בכלל נישט קיין זילבער. לויט די בדיקות האט זיך ארויסגעשטעלט אז 16-17 פראצענט פון פדיון הבן מטבעות וואס דרייט זיך ארום זענען פאלשע. היות מען קען נישט אנקומען צו קויפן די מטבעות פון די רעגירונג אליינס, איז די איינציגסטע עצה עס בודק צו זיין, און ער האט געמאלדן אז אין די קומענדיגע טעג גייט די זילבער געשעפט 'אינטערנעשאנעל סילווער' אין וויליאמסבורג, אריינבאקומען א מאשין וועלכע קען בודק זיין זילבער צו עס איז ריכטיג אדער פאלש, און לפי הוראות הרבנים, דארף יעדע טאטע וואס מאכט א פדיון הבן, צו ערשט בודק זיין די מטבעות אויב עס איז ריכטיג.

הגה"צ אבד"ק אייזענשטאט שליט"א

דאן האט דער יו"ר איבערגענומען דאס ווארט, און אריבערגעפירט די רבנים צו די האקעלע יסודות'דיגע נושא אויף וועלכע מען האט פאררופן די אסיפה, איבער די מדריכי חתנים וכלות וכדומה. ער האט אין קורצן ארויסגעברענגט די פראבלעמען וועלכע קומען פאר אין 3 שטאפלן. ביי די מדריכים חתנים וכלות פאר די חתונה, ביי די שלום בית שיעורים און קורסעס נאך די חתונה, און ביי די טערעפיסטן צו וועלכע מען גייט פאר הילף ביי פראבלעמען.

דאן האט גענומען דאס ווארט הגה"צ אבד"ק אייזענשטאט שליט"א מגדולי הרבנים בעיר בארא פארק, וועלכער האט שטייענדיג במוצאי ימי החנוכה ארויסגעברענגט, אז כאטש טומאה הותרה בציבור טאר מען נישט מחנך זיין קיין ביהמ"ק בטומאה, און דא איז מען ליידער מחנך הייליגע אידישע שטובער מיט די ארגסטע טומאת הגוים. ער איז דורכגעגאנגן ווי אזוי די סארט הדרכות זענען צוגעגאנגן במשך הדורות, מיט אן אפגעהיטנקייט און יראת שמים, און ווי עס איז היינט פארוואנדעלט געווארן אין א ביזנעס פון קורסעס, וואס מען דארף ציען דערצו ווי מער מענטשן, און אזוי זוכט מען צו געפעלן און אויפקומען מיט נייע דרכים און קולות אשר לא שערום אבותינו, אן האבן אפילו א רב וואס זאל גיבן די השגחה דערויף. 

דער חשוב'ער רב האט געגעבן פארשידענע דוגמאות וואס ווערט אלס געזאגט ביי די שיעורים, דורך פרעמדע רעדנערס פון די אנדערע עק וועלט, אן קיין שום הסכמה פון א רב, און זיי ווערן די מורי הוראה פונעם דור, וחברא חברא אית ליה, די התירים גייען פון איינעם צום צווייטן. און דער תירוץ אויף די אלע חורבנות איז שלום בית, און דער צייט וואס דאס ברענגט גאר די פארקערטע. דער רב האט מציע געווען, עס זאל נישט זיין א זאך ווי הערן א האטליין אין די ענינים אן א הסכמה פון אזא רב, וואס מען וויל אז די קינדער זאלן נתחנך ווערן לויט אים. יעדע מדריכה דארף האבן א רב וואס זאל איבערקוקן אירע פאפירן וואס זי זאגט. יעדע מדריכה דארף זיין פארבינדן מיט א רב וועם זי פרעגט אלע אירע שאלות, און די קהלות זאלן זיין אחראי דערויף עס מוציא צו זיין מכח אל הפועל.

הגה"צ ר' חיים דוד כ"ץ שליט"א דומ"ץ סאטמאר ב"פ:

דאן האט גענומען דאס ווארט הגה"צ ר' חיים דוד כ"ץ שליט"א דומ"ץ סאטמאר ב"פ, וועלכער האט מיט טרערן אין די אויגן אראפגעלייגט פאר די רבנים דעם חומר המצב. ארויסברענגנדיג דעם חורבן אז די גאנצע זאך פון קדושת הבית איז געווארן א ביזנעס, ווען פארצייטענס האבן דערין עוסק געווען נאר רבנים און יראי ה' וועלכע האבן דאס געזעהן פאר א זכי', עוסק צו זיין אין המשכת קדושת ישראל. צולייגענדיג דעם חורבן אין 3 חלקים. קודם די ערליכע מדריכות אבער זיי גיבן זייערע שיעורים ברבים, און וואס מען דארף מתיר זיין פאר איינעם ווערט א נחלת הכלל. צווייטענס דער רייץ צווישן די מדריכות זיך צו גיין לערנען ביי פרעמדע צווייפעלהאפטיגע מחנכות. והאחרון הכביד, נישט ערליכע מדריכות וואס דער גאנצער ענין זייערע האט נישט קיין שום שייכות מיט קדושת ישראל.

דער חשוב'ער דיין האט פארלאנגט אז יעדער מדריכה זאל האבן א רב וואס זאל איר לערנען וואס צו זאגן, און די קהלות זאלן זיין די וואס שטעלן די מדריכות, און די קלענערע קהלות זאלן זיין פארבינדן מיט די גרעסערע, און נישט די קינדער זאלן ח"ו בוחר זיין צו וועמען צו גיין. 

הצעות מהרבנים הגאונים שליט"א:

דאן האט מען געהאט די געלעגענהייט צו הערן פון פארשידענע רבנים מנהיגי הקהלות, זייערע הצעות אין דעם הארבן ענין. צום ערשט האט מוסיף געווען הגה"צ ר' מנחם מענדל טייטלבוים שליט"א אבד"ק סאטמאר וויליאמסבורג, איבערן חורבן וואס טעראפיסטן מאכן אן. ווי אויך די וויכטיגקייט אז יעדע קהלה זאל צוזאמנעמען זייערע מדריכות יעדע שטיק צייט הערן איבער די פרישע שאלות און פראבלעמען, און אזוי ארום וועלן זיי זיין אונטער די שטענדיגע השפעה פון די רבנים. הגה"צ דומ"ץ שיכון סקווירא שליט"א האט ארויסגעברענגט מיט ווייטאג אז פיל זענען שולדיג דערין די שבתון'ס וועלכע קומען פאר מחוץ לעיר, און עס ווערן דארט געהערט דרשות פון צווייפלהאפטיגע רעדנערס מכל קצוי תבל, און ער ווייסט פון פילע גיטין וואס זענען צושטאנד געקומען דורך די שבתים. מען דארף אוועקשטעלן אז יעדער אזא מין שבת, מוז האבן א השגחה אויף אלע זייערע רעדנערס. כ"ק אדמו"ר מגאלאנטא שליט"א, האט צוגעלייגט אז די אלע ענינים געהערט בכלל נישט צורעדן איינער צום צווייטן אדער ברבים, נאר צו א רב אדער מורה הוראה פערזענליך.

החלטת האסיפה הרה"ג ר' זושא כ"ץ שליט"א מו"ץ בקיט"ל:

דאן האט הרה"ג ר' זושא כ"ץ שליט"א מו"ץ בקיט"ל, מכריז געווען די החלטת האסיפה אין די ענינים. זיך פאררופענדיג אויף א תשובת חת"ס אז יעדע אזא אויפנאמע דארף ווערן געמאכט נאר דורך די קהלות און זייערע רבנים וועלכע קענען גוט די מדריכים ומדריכות וועלכע מען נעמט אויף. ווי אויך קענען די שיעורים נישט געגעבן ווערן ברבים, און עס קען בשום אופן נישט אדוועדטייזט ווערן, און עס קען נישט געגעבן ווערן קיין דרשות אין די ענינים נאר מיט די הסכמה פון א קהלה און זייער רב. מטעם די התאחדות הרבנים האט מען געשטעלט א וועד פון 4 רבנים וואס זאלן זיך אפגעבן דערמיט, הרה"ג ר' שלום יצחק טויבער שליט"א מו"ץ באבוב ב"פ, הרה"ג ר' אברהם הערש וואזנער שליט"א אבד"ק סאטמאר מאנסי, הרה"ג ר' אהרן שמואל פאדווא שליט"א מו"ץ סאטמאר ב"פ, הרה"ג ר' בנימין זאב פליישער שליט"א מו"ץ וויזניץ ב"פ.

הגה"צ ר' אברהם הערש וואזנער שליט"א אבד"ק סאטמאר מאנסי:

דאן האט דער יו"ר אריבערגעפירט די אסיפה צו א פרישע נושא וואס איז עומד על הפרק, דאס איז די נושא פון די פסול'ע מזוזות וועלכע זענען פארשפרייט אויף די מארקעט. דערמאנענדיג אז רביה"ק מסאטמאר זי"ע האט שוין ביי דעם כינוס כללי בשנת תשכ"א מעורר געווען דערויף, און ער האט איבערגעגעבן דאס ווארט פאר הגה"צ אבד"ק סאטמאר מאנסי שליט"א, וועלכע איז געשטאנען לימינו פון זיין גרויסן זיידן דער בעל שבט הלוי זצ"ל, וועלכע איז געשטאנען אין שפיץ פונעם וועד משמרת סת"ם, און אויפגעטון גדולות ונצורות אין דעם ענין.

דער רב איז צום ערשט אדורך די היסטארע פון די זאך. אז רביה"ק מסאטמאר האט דאן תשכ"א געזאגט אז 99% פון די מזוזות אין אמעריקא זענען פסול, און עס איז טאקע אזוי געווען, ווי מען זעהט ווען מען איז בודק מזוזות פון אלטע הייזער דא אין אמעריקא. ב"ה במשך די יארן איז דער מצב בעסער געווארן, און זינט עס איז נתייסד געווארן דער ועד משמרת סת"ם האט מען אנגעהויבן נאכגיין ווער עס שרייבט די תפילין ומזוזות וואס ווערן פארקויפט אין די גאס, וועלכע 80-90 פראצענט דערפון קומען פון ארץ ישראל.

דער רב האט שטארק מעורר געווען איבער דאס נישט נעמען פון קיין סופר וועלכע האט נישט קיין קבלה, און אז מען דארף יעדע 3 יאר נאכאמאל זיך פארהערן די הלכות. ער האט מסביר געווען אז ווען מען באשטעלט 15 מזוזות פאר א נייע דירה הארט פארן זיך אריינציען, קען דער סופר ביי וועם מען באשטעלט, נישט שרייבן אליינס די אלע מזוזות אין אזא קורצע צייט. דעריבער קויפט ער פון אנדערע, דארף מען דאס נאכגיין פון וועם קויפט ער. אין ארץ ישראל איז פארהאן גאר אסאך סופרים, פארהאן ערליכע, אבער זיי האבן נישט קיין קבלה, דערנאך אין פארהאן מזרח'יסטען וכדומה וואס מען וואלט ביי זיי אינדערהיים קיין קאלט גלעזל וואסער נישט געטרינקן, און זייערע מזוזות באקומט מען. פארהאן וואס די סוחרים דאהי גיבן נעמען אויף די סופרים, כאילו דאס איז פון א תולדות אהרן חסיד און דאס איז פון א ברסלב'ע חסיד, אינדערצייט וואס דער סוחר אליינס ווייסט נישט פון וועם עס קומט, ער האט עס אויך באקומען אן א נאמען. דערב האט מיט ווייטאג ארויסגעברענגט אז פלייש וואס מען באקומט אויף אזא אופן פון אן אנדער לאנד, וואלט מען קיינמאל נישט אין מויל גענומען.

דאן האט ער אדרעסירט די לעצטיגע שערוריה, אז עס איז אנגעקומען פילע סטענסיל מזוזות פון ארץ ישראל, וועלכע מען האט געזעהן אז אלע זענען געשריבן פונקטליך די זעלבע, ווייל עס איז געשריבן געווארן מיט א סטענסיל. עס קומט גראדע פון סופרים מיט קבלה, נאר עס איז נישט געשריבן געווארן כשר. דער רב האט ארויסגעברענגט אז עס איז נישט שייך קיין השגחה דערויף, ווייל יעדער סופר שרייבט ביי זיך אינדערהיים, און צומאל איז זיין נסיון גאר גרויס. מען ארבעט אויף א שטיקל פיקוח וואס מען זאל יא קענען מאכן דערויף, אבער ביזדערווייל דארף מען מעורר זיין דעם ציבור נישט צו קויפן, אפילו שיינע מהודר'דיגע מזוזות, נאר פון א סופר וועמען מען קען אלס אמת'ער ירא שמים.

הרב ר' יחזקאל קירשעווסקי פון טע"ג ב"פ:

דאן איז די אסיפה אריבער דן צו זיין איבער די פרישע נסיונות אינעם פעלד פון טעכנעלאגיע. הרב ר' יחזקאל קירשעווסקי הי"ו פון טע"ג ב"פ, האט אויפגעברענגט פאר די רבנים דעם פראבלעם, אז מען פארקויפט אין די סעלפאון געשעפטן נישט כשר'ע סעלפאונס, און ביז מען קומט עס פילטערן ביי זיי, זעהן זיי אז מען האט שוין ביזדערווייל געניצט דעם טעלעפאון אן קיין שום פילטער. ער האט אראפגעלייגט דעם חילוק פון דאהי ביז ארץ ישראל, ווי די געשעפטן פארקויפן נאר כשר'ע טעלעפאנען וועלכע זענען שוין מאושר, עס באקומענדיג שוין אזוי פון די סעלפאון קאמפאניס מיט וועלכע מען האט א צוזאמענארבעט, און סמארטפאונס קען מען בכלל נישט קויפן אין די געשעפטן נאר דורך די קהלות. משא"כ דאהי באקומט מען דעם סעלפאון פון די קאמפאני דורכ'ן פלען וואס מען האט, און טע"ג וכדומה האבן נישט קיין שום קשר מיט די סעלפאון קאמפאניס. ווי אויך דא קען יעדער מיט אדוועטייזמענטס זיך אנגעבן אלס כשר, אן האבן קיין שום גיידליינס וואס מיינט כשר און וואס נישט. מען איז שוין געזיצן מיט די סעלפאון געשעפטן, אבער לויטן היגען מציאות איז נאך דא שוועריגקייטן עס מסדר צו זיין. עס איז דא פארשידענע רעיונות אויפן טיש, אבער מען דארף די קאאפעראציע פון די געשעפטן און פונעם ציבור.

הרב ר' ברוך יודא כהנא פון טע"ג: 

דאן האט איבערגענומען דאס ווארט הרב ר'  ברוך יודא כהנא פון טע"ג, וועלכע האט אדרעסירט דעם פראבלעם פון געשעפטן וועלכע פארדינגן סעלפאונס אן קיין פילטער, און זאגן נאך אן נישט צו לייגן קיין פליטער. אויך האט ער מעורר געווען איבער די mp3 פלעיערס וועלכע זענען געהעריג אפען צום אינטערנעט, און די קינדער קויפן עס מיט די הסכמה פון די עלטערן, וועמען עס פאלט נישט איין אז עס ווערט פארקויפט אין די היימישע געשעפטן אומגעפילטערט. ווי אויך האט ער מעורר געווען איבער די כשר'ע סעלפאן וועלכע זעהט אויס ווי א סמארטפאן, וועלכע ברענגט א מכשול ביי אנדערע אז א סמארט פאון איז א כשר'ע זאך.

דאן איז ער אריבער צו די קאמפיוטער קיאסקן, וועלכע האבן גראדע יא גוטע פילטערס, אבער די מציאות איז אז קומט פאר מכשולות דארט. היות מען איז געווענליך נישט דארט לצורך פרנסה, ובפרט ווען מען זוכט נישט קיין ספעציפישע זאך, נאר מען פארברענגט דארט, ווערט מען אפט נכשל דורך די לעכער אינעם פילטער. ער האט מציע געווען צו לייגן שטארקערע פילטערס אין די קיאסקן, ווי אויך מסדר צו זיין א געוויסע השגחה וואס עס קומט פאר אינעם קיאסק, אנצייגענדיג אז אין בארא פארק איז שוין דא אזא קיאסק מיט א שטענדיגע השגחה.

אויך האט ער מעורר געווען איבער אפיסעס אויך פון מוסדות התורה וועלכע האבן נישט קיין פילטערס. ער האט מודיע געווען אז טעג האט א ליסט וואס הייסט wps, ווי מען קען זיך נאכפרעגן אויף יעדן אפיס פאר מען שיקט אהין א קינד ארבעטן, צו וויסן וואספארא פילטער זיי האבן. אויך האט ער מודיע געווען פאר די רבנים אז די 'נעט פרי' פילטער איז דער בעסטער פילטער, וואס כאטשיג מען קען דאס נישט פארלאנגן דורך די מוסדות, ווייל עס וועט נישט ארבעטן פאר יעדן, איז דאס אבער דער מערסטע אפגעהיטענסטער פילטער וואס איז פארהאן.

הגה"צ אבד"ק ישראל והזמנים שליט"א:

דאן האט גענומען דאס ווארט הגה"צ אבד"ק ישראל והזמנים שליט"א בשם רבני טע"ג, אויסשמועסנדיג, אז מען קען נישט זאגן אז די סעלפאון סטאר'ס וועלכע פארקויפן אומגעפילטערטע סעלפאונס, זענען נישט עובר אויף לפני עור ווייל עס איז תרי עברי דנהרא ווייל מען קען דאך עס פילטערן. ווייל עס איז נישט ריכטיג, ווייל אין אפוטרופוס לעריות, און עס איז א איסור גמור צו פארקויפן סעלפאונס אן קיין פילטער.

דאן האט הרה"ג ר' שמואל פריעדמאן שליט"א דומ"ץ בקרית יואל, געשלאסן די אסיפה, זייענדיג מעורר די רבנים פארצולערנען פאר די בעלי בתים דיני אבהע"ז, די הלכות וואס זענען נוגע לקדושת בית ישראל, און ער האט ארויסגעגעבן צו די אסיפה א ספעציעלע קונטרס פאר די שיעורים. ווי אויך האט ער מעורר געווען די רבנים, מען זאל מעורר זיין די בעלי בתים זיך אנצושליסן אין 'דעהו', וועלכע שיקט ארום וויכטיגע הלכות אין די ענינים יעדן טאג אויפן קאמפיוטער, און אין דעם זכות וועלן מיר זוכה זיין עס זאל זיין והיה מחנינו קדוש.

די הונדערטער רבנים האבן זיך אויפגעשטעלט פון די דריי שעה'יגע אסיפה, מיט פעלזן פעסטע החלטות צו שטיין על משמרת קדושת בית ישראל, ולשמור על גחלת ישראל שלא תכבה, און צו שטיין גרייט נאכצופאלגן די הוראות און די רעזולוציעס פון די אסיפה וואס וועלן ארויסקומען, צו פארזיכערן אז די אלע תיקונים ווערן טאקע אינפארסירט. פון יעדנס מויל האט זיך געשעפשעט א הייסע תפלה, אז חפץ ה' בידינו יצליח, און פון דעם אסיפה לשם שמים זאל ארויסקומען א קידוש שם שמים, למען קדושתן וטהרתן של ישראל.