דברים כהוויתן א קלארע איבערזיכט און אלע דעטאלן ארום דעם ווייטאגליכע פרשה

לאמיר אביסל משוגע מאכן דעם איראנער אגענט אלעס האט זיך אנגעהויבן ווען דער חתן האט באקומען מעסעדזשעס פון א פיינטליכן אגענט, און ער האט גלייך פארשטאנען אז מען רעדט דא פון א נארישע אראבער וועלכע זוכט ארויסצושאפן שפיאנאזש איבער מדינת ישראל, ער האט באשלאסן ווי עס איז די שטייגער ביי בחורים, זיך אביסל צו אונטערהאלטן אויף יענעמס חשבון און אין די זעלבע צייט מאכן אפאר דאלאר אויך.

ער האט ארומגעשלעפט דעם איראנער אגענט און אים גארנישט צוגעשטעלט וואס איז סיי וואס ווערטפול פאר א פיינטליכע רעגירונג, די איראנער האט געשיקט אפאר דאלער האפנדיג אז צוביסלעך וועט ער קענען אריינשלעפן דעם בחור צו טון עכטע שפיאנאזש.

ווען דער אגענט האט אנגעהויבן בעטן עכטע בילדער פון סענסעטיווע ערטער האט דער חתן בלאקירט זיין נאמער און מען נישט געהאט קיין שום קאמוניקאציע מיט אים.

ווען דער חתן האט זיך צוריקגעקערט אהיים קיין אמעריקא איז ער אריינגערופן געווארן אין א זייטיגע צימער אין JFK ווי אן עפ-בי-איי אגענט האט אים אויסגעפרעגט איבער זיין קאנטאקט מיט דעם איראנער אגענט, דער חתן האט געוויזן פאר דעם עפ-בי-איי אגענט אלע זיינע אויסטוישן מיט די איראנער און אז ער האט זיך בלויז אונטערגעהאלטן אויף זייער חשבון, דער עפ-בי-איי אגענט האט אים באשטעטיגט אז ער האט נישט געטון קיין שום פארברעך און האט אים פריי געלאזט.

ווען מען האט זיך פארבינדן מיט איינער וואס ווערט באטראכט אלס דער בעסטער אדוואקאט אין ארץ ישראל האט יענער ערנסט געוואלט אננעמען דעם קעיס, זעענדיג אז עס איז א לעכערליכע באשולדיגונג, ער האט אבער זיך אפגעזאגט נאכדעם וואס זיינע מיטארבעטער האבן רעוואלטירט און זיך געוואלט אפזאגן פאר חטא פון:

פארטיידיגן א פרומע איד, א חרדי! אין די יעצטיגע טעג ארבעטן די עסקנים פיבערהאפטיג און האבן ב"ה מצליח געווען צו בויען א גאר טייערע און סוקסעספולע פארטיידיגונג טיעם, פון צוויי באזונדערע אדוואקאטן פירמעס.

איינס איז אורי קרב, א גאר בארימטע קרימינאלע פארטיידיגונג אדוואקאט אין ארץ ישראל, דער צווייטער איז רועי שיינדארף, א וועלט בארימטער אינטערנאציאנאלע אדוואקאט וועלכע האט שוין פארטיידיגט מדינת ישראל אין אינטערנאציאנאלע געפעכטן און האט א שטארקע איינפלוס און מאכט אויף אזעלכע פעלער אין אר"י.

דער פארשלאג פאר שב"כ די שב"כ איז גאר שטייף און זיי דארפן א קרבן, זיי זוכן צו געבן דעם מעסעדזש און זענען ליידער נישט גרייט נאכצולאזן.

אין געהיימע געשפרעכן האבן עסקנים פארגעשלאגן א פלאן וויאזוי די שב"כ קען אראפקומען פון בוים און נישט אויפגעבן אויף זייער אנטשלאסנקייט צו 'שיקן א מעסעדזש'.

א פלאן וואס וועט אי"ה באפרייען דעם חתן און פארזיכערן אז אנדערע פאלן נישט אריין אינעם זעלבן פלאנטער!

לויט דעם פלאן וועט מען בעז"ה, אין אויסטויש פאר זיין באפרייאונג, געבן גרויסע געלטער פאר א עדווערטייזמענט קאמפיין אין ארץ ישראל צו ווארענען בירגער נישט צו רעדן מיט פיינטליכע אגענטן.

די 'מעסעדזש' וועט ווייטער אנקומען, און דער חתן וועט נישט דארפן זיין א קרבן ציבור דערפאר. די עסקנים האפן אז די פלאן וועט זיך בס"ד אויסארבעטן, און כלל ישראל קוקט ארויס פאר ווייטערדיגע פרייליכע נייעס.