יהדות אמעריקע אונטערן טיפן איינדרוק פון מעכטיגער כבוד התורה ביים ריזיגן דרשו וועלט סיום פארלאפענע זונטאג פרעצעדענטלאזער מעמד איז דער געשפרעך פונעם טאג דורך: הר"ר הירצקא גרינפעלד פרודענטשעל צענטער, ניו זשערסי נאך לאנגע וואכן און חדשים וואס מען גרייט זיך דערצו, איז דער גרויסער נאכט ענדליך אנגעקומען. מען האט שוין געהערט פון די ריזיגע 'דרשו וועלט סיומים' אין אלע טיילן פון די וועלט אין די לעצטערע וואכן, אבער דער קלימאקס איז געוויס דער ריזן סיום, אדער בעסער געזאגט: סיומים, וואס איז פארגעקומען דעם זונטאג פרשת יתרו, לסדר מתן תורה, אין עטליכע ריזיגע לאקאלן אין נוארק, ניו זשערסי. דער 'דרשו וועלט סיום' וואס איז געווען געצילט פאר יהדות אמעריקע איז געווען פרעצעדענטלאז אין פארשידענע פראנטן, און מען וועט עס נאך באשרייבן אין לענגערע ארטיקלן, אבער יעצט, שטייענדיג הארט נאכן גרויסן מעמד, ווען מען גייט שוין אט אט צום דרוק, קען מען נישט אויסלאזן אן גארנישט אראפלייגן אויפן פאפיר, וועלן מיר פרובירן כאטש אין קורצן אראפלייגן אביסל פון דעם היסטארישן אווענט. באלד ביים אנהייב פונעם מעמד, האבן די באטייליגטע באקומען די געפיל אז עפעס אויסערגעווענליך גייט דא פארקומען. געווען איז עס ביים תפילת מעריב, וואס איז פארגעדאווענט געווארן דורך הרב אברהם בליהמאן פון טראנטא, וועלכער איז דער חותן המלך, דער שווער פון הגאון רבי דוד האפשטאטער שליט"א נשיא ומייסד פון דרשו, וועלכער האט אלס קינד נאך געהאט די זכיה צו זיין אין די אנוועזנהייט פון רבי מאיר שפירא זצ"ל, און זיך געלערנט א ניגון פון אים. באלד דערנאך האט זיך אנגעהויבן א מוזיקאלישע געזאנג דורך ר' מאטי שטיינמעץ, וועלכער האט קונצליך אנגעהויבן דאס וואס האט זיך ארויסגעשטעלט צו זיין א רייכע מוזיקאלישע נאכט מיט די גרעסטע שטערנס אין די היימישע עולם הנגינה. דאן האט דער יושב ראש, הרב לייביש ליש שליט"א, וועלכער האט באזונדער עטליכע מאל עלעקטרעזירט דעם ציבור דורכאויס די מעמד, אויסגערופן הגאון רבי אהרן טויסיג שליט"א, משגיח דישיבת אלכסנדר בני ברק, וועלכער איז ספעציעל געקומען צו פארן פון ארץ ישראל לכבוד דעם היסטארישן סיום, ער זאל קומען אויפטרעטן לכבוד דעם מעמד. הרב טויסיג שליט"א האט מיט זיין אייגענארטיגע ווארימע רייד, אריינגעברענגט א חיות און ווארעמקייט ביים עולם, און ארויסגעברענגט וויאזוי די אהבת התורה פון די טויזנטער לומדים, ברענגען ארויס א געשריי צום אייבערשטן: "מיר האבן דיר ליב", און מען דארף נעמען דעם געלעגנהייט זיך צו מחזק זיין מיט א התחדשות, און אפילו די וואס האבן נישט מיטגעהאלטן ביז היינט, זאלן זיך נעמען מיטהאלטן די פילע דרשו פראגראמען מהיום והלאה. באזונדער האט ער מיט טרעפליכע רמזים ארויסגעברענגט די חשיבות פון די דרשו פראגראמען, וואס זענען נאך מיסודו פון דער גרויסער גאון און צדיק רבי מאיר שפירא זצ"ל, און א דאנק דער נשיא רבי דוד שליט"א ווערט עס נישט פארשלאפן, וויבאלד ר' דוד זעלבסט שלאפט נישט, און דער רמז דערפון: בלילה ההיא נדדה שנת המלך, נדדה איז ראשי תיבות: נשיא, דרשו, דוד, האפשטאטער... און ער האט צוגעענדיגט, אז אין די יעצטיגע טעג, ווען רבבות אלפי ישראל הייבן אן ש"ס פון אנהייב, הערט זיך געוויס נישט דער בת קול, אז: אוי להם לבריות מעלבונה של תורה! דאן האט א פרישע מוזיקאלישע סעריע אריינגעברענגט א שמחה און חשק ביים ציבור, פארגעזינגען דורך ר' אייזיק האניג, און ר' אהר'לע סאמעט, וועלכע האבן, איטליכער אויף זיין שטייגער, געהויבן די געמיטער ביים ציבור. דאן האט מען אויסגערופן הגאון הגדול רבי דוד כהן שליט"א ראש ישיבת חברון, וועלכער איז אויך ספעציעל געקומען צו פארן פון ארץ ישראל, טראצדעם וואס ער פארט זעלטן ארויס פון אר"י, פארט אבער צוליב די חשיבות פון דרשו איז ער געקומען באשיינען דעם מעמד, אריינצוגעבן חיזוק אין די צענדליגער טויזנטער דרשו אידן אין אמעריקע. הרב כהן שליט"א האט ארויסגעברענגט וויאזוי בלויז תורה קען אונז האלטן אין דעם ביטערן גלות, ביז מיר וועלן ענדליך אויסגעלייזט ווערן. ער האט נאכגעזאגט פון הרב הוטנער זצ"ל, אז דאס מסיים זיין ש"ס איז נישט ווי איינער איז מסיים עטליכע מסכתות, נאר עס איז גאר אן אנדערע בחינה, עס איז א סיום אויף תורה שבעל פה, און דער לומד ווערט איין שטיק תורה, כקדושת ספר תורה. ער האט צוגעענדיגט מיט גאר א טרעפליכע ווארט פון ר' חיים זצ"ל, וועלכער האט זיך געשטעלט אויפן לשון 'שישו ושמחו בשמחת התורה', וואס איז לכאורה שווער צו פארשטיין די לשון ב'שמחת התורה', ווען עס וואלט געדארפט שטיין 'בתורה', נאר זעט מען פון דעם אז די תורה זעלבסט האט א שמחה ווען מען לערנט און איר, ובפרט ווען מען ענדיגט איר! היינט נאכט פריידט מען זיך מיט די תורה! נאך א קורצע געזאנג פון ר' אהר'לע סאמעט, האט מען געהערט פייערדיגע דברי חיזוק פון הרה"ג ר' ירוחם אלשין שליט"א מראש ישיבה דבית המדרש גבוה לעיקוואוד, וועלכער האט מאריך געווען איבער די גרויסע כח פון תורה וואס מיר האבן, און וואס מיר דארפן ספעציעל האבן היינט ווען מיר זענען אין אזא געפארפולע גלות, נישט בלויז בגשמיות נאר אפילו מער ברוחניות, ווען עס הערשט א סכנה פון די גוי'אישע איינפלוס וואס וויל אונז ליידער אינגאנצן איינשלינגען, און די איינציגסטע עצה איז די הייליגע תורה. דאן איז מען צוגעקומען צום קלימאקס פונעם אווענט: דער סיום הש"ס, וואס איז געמאכט געווארן דורך דער ספעציעלער גאסט, כ"ק אדמו"ר מצאנז שליט"א פון ארץ הקודש, וואס האט נאכגעפאלגט מיט גאר הארציגע דברות קודש פונעם רבי'ן שליט"א, וואו ער האט צווישן אנדערס ארויסגעברענגט ווי שטארק די לימוד התורה פון די דרשו אידן טוען אריינדרינגען אין די הערצער פון די לומדי תורה, נישט בלויז וואס מען לערנט 'יוצא צו זיין', און פונקט ווי ביי די אידן אין מדבר, וואס מען זעט אין מדרש אז דער אייבערשטער האט געגעבן די תורה לאוכלי המן, כדי די תורה זאל זיך באזעצן אין זיי, די זעלבע איז מיט די צענדליגער טויזנטער לומדי דרשו, טוט זיך די תורה באזעצן אין זיי באופן קבוע. דאס האט נאכגעפאלגט מיט די הדרן, וואס איז געזאגט געווארן דורך הגאון הגדול רבי ראובן פיינשטיין שליט"א. באלד דערנאך האט זיך די גאנצע זאל ספאנטאן אויפגעשטעלט אין גאר געהויבענע טענץ לכבודה של תורה, ווען די ווענט האבן ווי מיטגעטאנצן. מי שלא ראה שמחה זו, לא ראה שמחה מימיו! צענדליגער טויזנטער אידן טאנצן און פרייען זיך מיט די הייליגע תורה, און מען שרייט ארויס פון טיפענישן פון הארץ: אנא, אנא, אנא, עבדא דקודשא בריך הוא! דאן האט מען געהערט פייערדיגע דיבורים פון דער נשיא ומייסד פון דרשו, הגאון רבי דוד האפשטאטער שליט"א, וועלכער האט שטארק ארומגערעדט איבער די גרויסע כח פון די תורה הקדושה דער עץ החיים, און וואס עס מיינט פאר דער מענטש, כי האדם עץ השדה. ווי שטארק עס קען איבערדרייען יעדע מצב, ביטער צו זיס. און ספעציעל היינט ווען די פיזישע און גייסטישע נסיונות באדראען אונז אלע, טוען מיר אבער אלע שרייען: מי לה' אלי, און מיט די כח פון 'דרשו ה' ועוזו' ווערט מען באשיצט פון אלע שוועריגקייטן, ביז משיח'ס טאג בב"א. א מוזיקאלישע יצירה דורך ר' זיינווייל וויינבערגער האט נאכגעפאלגט, צוזאמען מיטן ילד הפלא דוד הערשקאפ. דאן האט מען צוזאמען געזאגט קבלת עול מלכות שמים, פארגעזאגט דורך כ"ק אדמו"ר מוויזשניץ מאנסי שליט"א. דער עולם איז זיך צוגעגאנגען נאך פולע שעות פון עונג וקורת רוח אויף א זעלטענעם פארנעם, מיט הויפענעס באגאזשן פון חיזוק אין תורה ויראה, מיט א פעסטע קבלה אויף לעתיד, אז מען וועט זיך פארשטערקערן און פארבעסערן אין לימוד וידיעת התורה וחזרה.